親戚G今個月生日，話要食餐勁嘅，叫左丁山訂陸羽擺兩圍，食齊十大名菜，問佢做乜今年咁刺激，以前慶祝生日冇咁興奮嘅喎？親戚G話：「六月以來刺激之事太多，精神好緊張，見到咁多年輕人被捕，前途未卜，可能盡毀，好煩悶，不如搵藉口食多啲好嘢，聽講食嘢可以減壓喎。」
訂陸羽，話咁易，難得晚上夠膽出街㖭。於是上星期四約佢去陸羽飲茶寫菜，吃完點心，佢對火鴨絲燒餅、雀肉鴛鴦酥、豬膶燒賣讚不絕口，認為係別處所無，一睇點心價錢，平過佢時時去嘅福記，更加開心，於是寫菜寫到「過份」，一定要打包咁嘅款。點知到咗點零鐘，隱約聽聞人聲嘈雜，伙記來報，畢打街之中環快閃，出現防暴隊，氣氛緊張，唔知會唔會放催淚彈，於是順口問伙記：「星期六晚上在此吃飯，是否安全？」伙記答：「陸羽梗係安全，但你地九點幾食完鬆人之時，唔知有冇地鐵、的士或封路啫。」
親戚G一聽，大皺眉頭，因為佢有一晚返沙田，在路上困咗三四個鐘頭，正是見過鬼怕黑，諗咗一輪，都係明年先至嚟陸羽擺兩圍咯，今次取消訂位！又得啫，伙記話佢地返工困難，樓面近一半返唔到，晚上亦心急返屋企也。非常時期有非常行動，校友Y工作嘅集團在尖沙嘴有酒店，三個酒吧伙記打烊後搵的士返將軍澳，的士司機索價每位「五百」；注意係「每位」，仲要坐滿五個人先至開車，如此飛擒大咬，的士司機就肥仔啫，酒吧侍應就話：「我一日人工都冇五百蚊呀！」於是唔搭的士，上酒店網站一搜尋，發覺有酒店房間房租一晚都只係二百，於是齊齊往投宿，橫掂第二朝自將軍澳返去尖沙嘴又係好煩也。
親戚G卒之決定去沙田馬會食番家常便飯，點知有驚喜，凱旋廳由11月15日至24日有廣州名廚徐錦輝師傅獻藝，呈獻正宗粵菜。徐師傳來自廣州中國大酒店，凱旋廳大廚楊師傅請徐師傅出嚟，介紹畀左丁山認識，於是親戚G決定試吓，前菜有話梅燜豬手，茶香煙燻開封桂花雞，柚子醬蜜汁燒爽肉，桂花金瓜鮮蓮子，果然一新耳目，人人讚好，女士尤其搶住要食話梅；熱菜左丁山點咗一個木瓜扣肉，爽滑無比，不怕膽固醇者可食得開心，單尾有嶺南臘味糯米飯，西關冰菱角湯粉，甜品有久違了之傳統糖不甩，一句講晒，正正正。親戚G話估唔到唔去陸羽，竟然在馬會食到廣州名菜，有食神之至！