祖雲達斯前鋒基斯坦奴朗拿度（C朗）同女友佐真娜恩愛係人都知，最近佢兩位就被爆今夏已經秘密結婚，但C朗周三已經透過代表否認。不過，睇番C朗啲情史都相當豐富，除咗同俄羅斯索模艾琳娜五年情外，更試過被傳「中途轉基」，但傳到結婚嘅就係得佐真娜。
意媒爆八月結咗婚
據意大利傳媒報道，指C朗同佐真娜今年八月喺摩洛哥結咗婚，C朗身邊人士大爆兩人嘅婚期係8月29日，消息仲指C朗當日就同律師返去家鄉馬德拉群島改遺囑，保障呢位新婚太太，因為C朗所有嘅資產，都由佢阿媽Dolores保管。不過，周三C朗已經透過代表否認傳聞，重申呢位葡萄牙球王未婚之餘，仲話果啲全部都係假消息。
C朗同佐真娜喺2016年底開始拍拖，C朗17年頭帶佐真娜出席國際足協（FIFA）年度頒獎禮公開關係。佐真娜呢幾年為佢扶養小C朗同一對搵代母生嘅龍鳳胎外，仲同呢位葡萄牙球星誕下女兒Alana。兩人又不時喺社交媒體發佈幸福家庭合照，就算之前C朗捲入09年強姦案，佐真娜都力撐男友。雖然C朗今次否認已婚，但佢同佐真娜嘅關係已經好似家人一樣，呢點有別於C朗嘅前度。
曾傳「中途轉基」
要數C朗嘅情史，先要數俄羅斯索模艾琳娜，2人喺10年撻着，絕對可以用型男索女嚟形容，可惜呢段感情維持五年就玩完，有指係因為艾琳娜嘅「婆媳關係」唔好，之後仲缺席C朗媽嘅生日會，令C朗決定結束五年情。當時C朗被指火速同西班牙體育索主持Lucia Villalon撻着，不過之後有報道指，同艾琳娜分手嘅C朗其實大受打擊而轉口味，同摩洛哥拳手巴迪哈里爆出同性戀傳聞。
當時仲效力皇家馬德里嘅C朗被指同巴迪哈里係超友誼關係，佢一星期最少坐四次私人飛機去摩洛哥同哈里見面。C朗又不時喺社交媒體發佈佢哋攬頭攬頸嘅合照，仲有一張係巴迪哈里公主抱起C朗，令人懷疑佢真係「中途轉基」。不過，C朗之後遇到佐真娜，大家先肯定佢係鍾意女人嘅。