【本報訊】法律界人士指，被捕人士一日未被起訴，「一日未上庭，一日都唔可以限制佢出入境自由」，只有法庭才有權施加限制出入境的保釋條件，批評警方以行政手段侵犯《基本法》賦予市民的出入境自由。
有義務律師坦言，青年K現時瀕臨壓力爆煲，自覺處境猶如逃犯，「佢問係咪呢世都要匿埋，點解要逼到佢咁」，形容警方正製造白色恐怖，「一係你就拘捕佢囉，帶佢上法庭，堂堂正正提出保釋條件」。
僅法庭可施加相關保釋條件
他批評警方今次猶如透過隨時拘捕疑犯為由，變相向市民施加出入境限制，極不合理，「唔好呃人哋行出嚟，等人以為最多只係登記，但原來會被捕」。他指由於現時K既未被捕、亦非遭羈留，故不能申請人身保護令。
律師陳惠源指警方會因應個別情況，准許被捕人士自簽擔保，或以現金保釋外出；除此之外，警方無權施加任何附帶保釋條件，包括沒收旅遊證件或限制出入境，只有法庭才有權施加相關保釋條件。他批評警方今次做法根本是以行政手段侵犯《基本法》賦予市民的出入境自由，完全不合理，質疑警方濫權。
大律師陸偉雄指，即使是被捕人士，「一日未上庭，一日都唔可以限制佢出入境自由」；況且現在相關人士既非被通緝，亦非下落不明，「佢當然可以自由活動，冇理由限制佢，咁樣好大問題」。陸形容警方做法罕見兼奇怪，「點解當時唔拉，𠵱家又拉？」
■記者楊家樂