新劍郎（原名巫雨田）是粵劇界一線小生，現任八和會館的副主席，行內人都稱他田哥。入行五十多年的田哥，由「下欄」做起到現在名成利就，全靠堅毅意志，他力撐粵劇在香港有發圍，更說：「啲人話做戲搵唔到食，呢句話好錯！」近二十多年來，他還不時到不同學院推廣粵劇，希望可以散播種子，教導年輕人認識粵劇。
撰文︰祖李
攝影︰周樂桓
現年69歲的新劍郎，在中學畢業後就入戲行唱粵劇，在粵劇界已經歷五十多年光景。田哥日前接受《蘋果》專訪，原來他在小學五年級時，最大的娛樂就是跟父母到戲棚睇大戲，自此與粵劇結下不解緣：「嗰陣大戲係主流，我睇完好鍾意，返到屋企會攞住支棍嚟舞。有年暑假我好快做晒啲功課，媽媽提議我不如去學做大戲。」田哥由低做起，短短三年已有機會踏台板︰「我一出嚟就做『下欄』，有對白，唔使做最低層嘅『趯兵』。」
老倌合作似踢波
田哥曾與不少粵劇老倌合作，包括汪明荃、羅家英及阮兆輝等，他以踢足球作比喻︰「一隊足球隊可以海納百川，因為大家有咁嘅質素，就算之後要踢世界盃，喺唔同球隊收啲球員返嚟，佢哋又可以融合。做戲一樣，大家有咁嘅級數，好快磨合建立默契，同唔同演員仲有唔同火花。」
粵劇豐富了田哥的生命，除了地位，還有社會人士的認同：「你要好愛呢門藝術，先可以堅持行落去，尤其以前乜資源都冇，當你地位未上到好高時，好易放棄，要捱！去到某個階段，唔會再跑龍套，又要自己置裝，但人工又唔太高，呢段日子係艱辛，但亦令我學識珍惜，因為一切得來不易。」
學三年可以上台
從前入行艱難，田哥表示現在年輕人入行比過往容易，不同地方也有戲曲課程︰「一般學員學三年都可以上台，啲人話做戲搵唔到食，呢句話好錯！𠵱家普通售貨員得萬幾蚊人工，做成十個鐘，我哋一場戲，化妝到演出只係五個鐘，最平人工嗰個，都差唔多500蚊一場，你一個月開到二十幾日工都唔錯啦！加上粵劇係夜晚做，其他時間你可以兼職。」
近二十年來，田哥不斷到各大學院推廣粵劇，目的為培養一班有質素的觀眾︰「最重要係傳承，要教導年輕人認識粵劇，令佢哋成為觀眾接班人，我去小學演講，散播種子，希望15年後佢哋會買飛睇戲，咁就成功！」田哥下周將為第一屆「香港粵劇金紫荊獎」做評審：「係第一次向業界頒獎作鼓勵，老倌唔可以參加，要畀新晉肯定同鼓勵。」