律政司長鄭若驊於上周四晚出席英國倫敦一個講座途中遭示威者包圍，其間跌倒，主辦單位表示佢手臂受傷，律政司後來發聲明話鄭若驊「嚴重傷害」，但又冇交代有幾傷，佢日前喺倫敦接受傳媒訪問，首次談及傷勢，話左手手腕脫臼，仲要至少三個月至一年才能完全康復，不過睇完訪問，八方覺得可能佢個腦都有傷。
可能鄭若驊怕人質疑佢傷勢，所以佢日前喺中國駐倫敦大使館見記者，話脫臼位置需裝上鈦板穩固，又話醫生診斷左手需要至少三個月至一年才能完全康復，因手部神經有受損的症狀，日後可能要做手術。
叫鄭文傑向中國求助
不過八方擔心佢唔止跌親手，個腦都可能跌傷，有記者問佢，香港英國領事館職員的港人鄭文傑（Simon Cheng）接受傳媒採訪話，喺中國拘留期間被國安以不人道方式拷問逼供，究竟佢有乜回應，鄭若驊竟然叫鄭文傑應該將件事報告畀中國有關當局？俾賊仔打劫，叫人去搵賊仔投訴？係乜邏輯呀？