日前理大俾警方包圍，好多學生受傷，紅十字會派人入去作人道救援，得到唔少港人掌聲，至於獲港人每年捐5億嘅無國界醫生就一直冇影，網民洗版式狂轟下，佢哋仲出聲明話經過評估後，認為唔使派人喎！結果引起市民集體cut捐款，但發現同cut有線一樣難！可能真係講錢就有感情，無國界噚日急急派人去理大補鑊。
「中立」聲明犯眾怒
其實由反送中至今，好多捐款者已不滿無國界醫生唔見人，佢哋噚日份聲明又講到要保持醫療中立、又成立評估小組，認為香港醫療資源同救援能力充足，又唔係對香港情況漠不關心，但要根據評估結果作救援決定，結果再辣着網民，洗版式狂鬧咁多個月前線醫護係咁中彈，咁都唔叫人道危機？咁都要評估咁官僚？而且人道立場而言，並冇中立，只有救同唔救，於是成班網民立即發動cut捐款。
不過有網民話cut捐款唔易，個熱線根本打唔通，有人更嬲到直情cut信用卡，等捐款過唔到數，搞到無國界醫生要澄清冇阻人cut捐款，只係線路繁忙，到下午就有4個着「無國界醫生」T恤嘅人去理大，話去觀察情況，唔怪得有網民話cut捐款有效，一講到錢，評估立即唔同晒！