蔡少芬（Ada）同張晉喺6月拍片宣佈意外懷第三胎，終於追到個仔，上周五46歲嘅Ada順利生產，老公張晉噚日喺微博開心留言：「11月15日，母子平安，歡迎張樂兒來到張家，我們平安回家啦！」並附上全家福，啱啱生完嘅Ada雖然素顏，但精神唔錯，一家五口幸福滿瀉。
唔會減產
Ada噚日接受傳媒訪問時話：「其實一開始好驚，又要重新學習湊BB，但一見到BB嘅時候就好感動同眼濕濕，BB重8磅2安士，好健康，老公有跟埋入產房剪臍帶，好照顧我，多謝上天畀咗一個寶貴嘅產業我，好感恩又好興奮。」佢又話：「兩個家姐都已經大個女，所以好錫細佬，樂兒嚟到呢個家庭會好幸福，有個好愛佢嘅爸爸媽媽同家姐。其實我喺六年前已經封咗肚，今次係一個感恩嘅意外，就算生多咗個都唔會減產，大家記得有工作就要搵我！」而張晉就話：「非常開心，我哋一直都冇諗過會再有BB，所以真係要封呀！再唔封就我瘋。」
Ada同張晉結婚11年，一直恩愛。Ada曾公開自爆2010年拍攝《後宮甄嬛傳》時小產，隔咗半年先再次懷孕，翌年喜獲大女楚兒，2013年再誕下細女信兒。
撰文：馮仁昭
