無寶不落嘅立法會前主席曾鈺成，前晚現身理大意圖幫手解圍，但抗爭者又點會睬佢呢？但曾鈺成似乎亦志不在救理大內一眾青年人，因為佢同抗爭者只係講咗幾句，就當住傳媒鏡頭前搵人，一心尋找一個叫「朱媛」嘅女仔，事件之後更流傳成當事人係前國家總理朱鎔基孫女，亦傳言話就算唔係朱孫女，都係官政二代，政圈更流出唔少陰謀論，話要救嘅唔止「朱媛」一個，入面仲有其他重要人物子女。
救「朱媛」或只為掩飾
雖然曾鈺成極力否認有幫任何達官貴人搵仔女，但八方噚日聽到政圈有好多冇得證實傳聞，好似話呢個朱氏女仔係有背景人士，有家人可以搭線搵曾鈺成幫手，更重要係曾唔會拒絕，呢啲又點會係曾鈺成所謂嘅普通市民呢？
亦有政圈好事之徒同八方講，有傳曾救人前去過西環，估計曾未必只係救「朱媛」一個，事實上之前有傳理大內有海外生，亦傳有其他有背景嘅學生受困，要諗一個低調方法救佢哋呢啲人，所以好事之徒猜測救「朱媛」可能亦只係掩飾，掩護其他高幹子弟、內地有錢佬子姪，總之用個森林遮住關鍵樹木，仲要搵埋張達明加入救人，咁就唔咁令人聯想到建制呢邊要求人！
不過呢一切只係政圈好事之徒猜測，而對抗爭者來講，一齊打過仗都係手足，所以講到明就算係總理後人都唔會割席，反而打慣被捕人士嘅警察可能要自己睇路，一陣錯手亂打，冇咗份工事少，再教育營可能已經為你而開。
李八方