對於一班學生球員而言，籃球或佔據其中學生涯的大部份時間，他們過往所擔心的亦只是如何提升球技，為學校爭標。不過，香港今夏開始政局不穩而導致抗爭活動不絕，上月曾經傳出香港學界體育聯會將取消所有甲組球類賽事的消息，精英賽亦遙遙無期，未知的前景教一班學生感到迷惘，因學界賽事取消而頓失目標，亦怕中學生涯的回憶留下一片空白。在暴政之下，年輕人曾高呼「四大賽事，缺一不可」，誓要捍衞學界球員比賽的權利。
記者/攝影：許嘉明
吳欣潼 協恩中學隊長
協恩中學為學界女籃霸主，上季在九龍區D1學界女籃A Grade決賽擊敗寶覺後，已寫下14連霸的佳績，在精英賽亦所向披靡，過去10年都打入決賽，而且只曾於11/12球季不敵中華基督教會桂華山中學，其餘九次皆摘下桂冠。
外界常道她們是「神之隊」，但其實協恩眾將皆為普通女生，只是全隊在背後付出比他人更多的汗水去練習。隊長吳欣潼直言：「對住隊友，仲對得多過屋企人。」
背負協恩之名而戰，要捍衞球隊的榮譽，自然要付出更多。今年將畢業離隊的隊長吳欣潼直言，在協恩的六年間，逾七成時間皆與籃球隊一起度過：「除咗校隊練習，出到去（甲組）都係同番呢班人一齊練，我投放喺協恩籃球隊嘅時間仲多過讀書。」她續指在效力的甲組球隊偉邦練習得太晚，甚至跟家人相處的時間亦不多：「有時練波練到好晏，基本上返到去屋企人都瞓咗，對住隊友仲對得多過屋企人。」
精英賽的開賽時間遙遙無期，吳欣潼坦承擔心付出的努力付諸東流，但她表示要好好準備自己，應付未來的人生：「如果精英賽取消，我會唔開心同覺得可惜，因為精英賽係一個好大嘅舞台，畀學生球員去表現自己。我覺得大家咁努力練波，就係為咗打精英賽。不過驚嘅同時，我哋都要隨時準備開波。」
望領軍延續霸業
代表協恩出賽，對吳欣潼而言是一個學習的階段，她希望在最後一年的學界賽中擔當領袖角色，完成球隊的傳承：「可能中一入嚟係俾人帶住，要向師姐學習，而我去到中六就係要做番呢個角色。學咗咁多嘢，就要畀番咁多出嚟。」
這位射手更笑言，今年在陳欣汶和劉芳盈等人離隊後，自己亦應挺身而出：「我哋今年走咗好多主力，自己嘅責任大咗，要做嘅嘢比上年更多。不過今年係我最後一年代表協恩，無論係學界或所有籃球比賽，對我嚟講都係一個好好嘅回憶。」然而，能否繼續領軍稱霸，除了努力，還要聽天由命。
朱耀明 英華書院教練
假如大家看過寶覺中覺女籃的賽事，相信會對其主將潘頴雅留下深刻印象，這位18歲後衞去年未能帶領寶覺在協恩手上搶走九龍區D1學界冠軍，她在早前聽到學界A Grade賽事有機會取消時直言：「咁樣比輸畀協恩更大遺憾，因為連試嘅機會都冇埋。」
大家對潘頴雅的印象應是身披寶覺球衣作賽的畫面，但她透露在四年前為了打學界賽才轉校：「我由小四開始打波打到小六畢業，不過原本升讀嘅中學冇女籃隊，只可以喺午餐時間同男仔一齊打波，都會諗自己點解冇得打學界？」直至中三，潘頴雅因參加青訓而獲得轉校寶覺的機會，她笑言：「嗰陣心血來潮想打波，就去參加青訓，之後為咗籃球就轉去寶覺。有時都會諗，我係咪浪費咗三年時間。」
心血來潮重拾籃球，潘頴雅卻未有輕易再放下，只因自己喜歡這項運動，想變得更強︰「我唔係為咗出名而打波，我想求進步、想代表香港出賽。」找到目標後，她亦學懂為之付出：「我𠵱家18歲，籃球佔咗我人生嘅四分之三。我逢星期一至日都對住籃球，籃球喺我生命中係個男朋友咁。」潘頴雅笑指自己讀書成績不好，父母亦鼓勵自己為興趣而努力。
今季最後機會
潘頴雅下季便會超齡，今季是她最後一次出戰學界的機會，早前聽到學體會有機會取消所有A Grade球類賽事時，她坦承極擔心：「社會運動出現後，啲人就傳學體會取消學界，我好唔開心，因為今年係我同好多轉校過嚟嘅隊友最後一年，取消咗嘅話比輸畀協恩更大遺憾。」她續指寶覺早前更特意在校舉辦3日2夜的訓練營，只為備戰學界賽，假如學界及精英賽取消，一切心血亦會浪費：「大家練波係為咗贏九龍區冠軍。不過學界又唔知係咪取消，都有人諗到底練波係為乜？」
雖然未知學界賽事會延期至何時，但潘頴雅直言籃球路仍很長：「轉嚟寶覺之後，我知道咩係一分耕耘一分收穫，如果冇付出就冇家陣嘅成就。我想繼續變強，好似卓婷同李祉均咁，成為女籃頂級嘅得分手。」
黃雅亭 香港真光書院中六生
今年的「升班馬」香港真光書院，並非港島區D1的爭標分子，對於中六生黃雅亭而言，為學校贏得前三並拿下精英賽的入場券，可謂機會渺茫。不過，這並未有影響她對籃球的熱愛，因為在日復日的練習中，讓她與隊友留下難以磨滅的快樂回憶。
今年學界開鑼之時，香港真光書院的主將葉坤霖便因膝傷而提早收「咧」，令球隊只剩下六人苦苦支撐。其隊友、就讀中六的後衞黃雅亭直言，打球難免受傷，但為了籃球，一切皆值得：「我試過一年內四度拗柴，左右腳各兩次，嗰時為咗醫好腳傷，需要不斷睇醫生同物理治療。不過為咗打學界，我覺得一切都值得，因為呢啲係難以取代嘅回憶，無論為咗自己或隊友，都值得咁樣做。」打球並非強隊專利，對於黃雅亭而言，每年的學界皆為自己最期待的賽事︰「學界係中學嘅大型賽事，有固定嘅比賽數量，相反馬拉松就係淘汰制，而且比賽時間只得兩節，我哋從中吸取嘅經驗有限。假如學界取消，我哋會失去回憶同青春。」
打球學會堅持及溝通
練習既沉悶又辛苦，但有一班隊友共同進退的話，對黃雅亭而言也不致於太難捱，她笑言過去遇上不少低潮，但慶幸一班隊友仍在身邊支持自己：「球隊多次易帥，加上家陣社會嘅轉變，都令我哋無所適從。球隊有好多人都感到心情低落，但我哋互相扶持，最終一定可以打起精神。」她續指，除了校隊每周三天的恆常練習外，她和隊友亦會自發加操，希望能增強默契，她笑言：「溝通好重要，我哋唔識讀心術，要講出口先能夠畀對方知道自己嘅想法。」
除了友誼，黃雅亭在球場上的最大收穫是學懂堅持，她透露自己從小五開始打球，縱使技術未算了得，但多年來仍未有放棄的念頭，只因自己真的喜歡籃球這項運動：「我曾經連坐幾場冷板凳，可能我落場會令球隊輸波啦，不過因為咁令我知道自身不足，以後勤加練習，畢竟練到嘅都係自己嘅收穫。」
朱耀明 英華書院教練
朱耀明教練自2004年起執教英華書院，在這15年間為本地籃壇培養出不少人才。對這位桃李滿門的名帥而言，若果學界籃球賽取消的話，「對英華的影響會幾大」，因為舊生對中學生涯的回憶，都是由一場場的學界賽事譜寫出來。
英華體育風氣旺盛，籃球更是校內最受歡迎的運動之一，每逢大賽皆動輒過百人到場支持。學界賽事對朱sir而言，更是聯繫舊生的渠道：「對英華嚟講，冇籃球（學界賽）影響好大，假如球隊有機會打入修頓等大場，可能好多舊生都會到場支持，係一個令眾人聚首嘅機會，令到大家對英華嘅歸屬感變強。」的而且確，英華在17年曾舉辦200周年校慶的籃球賽事，當時修頓場內星光熠熠，如鄭錦興、鄧志恆、陳張敏、周家駒等人皆有現身，陣容堪比甲一賽事。
擔心學生失目標
作為學界傳統勁旅，英華在九龍區D1學界賽事穩佔三甲之位，近10年只曾於14/15球季得「梗頸四」而失去精英賽資格。朱sir笑言，不論師生對學界賽事都留下深刻回憶，每當碰頭亦會回想當年：「大家不時會提起以前嘅比賽，如邊個打得好而贏，邊個發揮差連累球隊輸波，無論師生對學界賽事嘅回憶都好濃厚。」朱sir續指，球員為籃球付出良多，如學體會取消精英賽，或會令他們目標頓失：「鍾意打波嘅學生都想打精英賽，除咗鋪天蓋地嘅宣傳，更希望參加學界最高水平嘅賽事。球隊今年未知攞唔攞到精英賽資格，但如果精英賽取消，令佢哋連爭取嘅機會都失去的話，球員絕對會擔心。」
師者，所以傳道、授業、解惑也。除了教授球技，朱sir亦希望在籃球場上教懂學生們做人的態度：「結果係點冇人知。不過你要做嘅，係先盡力做好本份。」雖然學界生涯有限，但這位嚴師直言眾人的籃球生涯不只得學界，因此球員亦需時刻裝備自己：「即使之前學界停賽，我哋都要照常練習。我哋唔可以睇到事情有希望先去嘗試，而係準備好自己去迎接機會。」