阿根廷星期二友賽烏拉圭，喺兩度落後下憑美斯1傳1射以2:2追平。
呢位早前被南美足協停賽三個月嘅球王，出番嚟狀態好之餘仲好火，上場叫巴西教練迪堤收聲後，今場又爭啲同卡雲尼開拖，唔通仲為自己被南美足協罰停賽懷恨在心？
卡雲尼賽後笠水
先講吓今場喺以色列舉行嘅友賽戰況，呢場波先開紀錄嘅係烏拉圭，卡雲尼接應蘇亞雷斯嘅助攻喺34分鐘破網，但阿根廷換邊後就由美斯還以顏色，左路罰球開入禁區造就阿古路頂入扳平，只不過追平五分鐘後，阿蘇主射罰球破網，再度幫烏拉圭領先。不過，踢到補時階段，阿根廷博到馬田卡沙利斯禁區內犯手球，12碼由美斯操刀射入，幫球隊追和2:2完場。
美斯復出後表現好落力，但同時都好大火氣，今場同卡雲尼就喺上半場尾段差啲大打出手。當時美斯突破被侵犯，鏡頭捕捉到卡雲尼似係上前挑釁話：「你夠唔夠膽今晚同我隻揪啊？」而美斯就回應：「你想點咪點，我隨時奉陪！」雙方火藥味好重，好彩烏拉圭後衞高甸出手勸交，先緩和到場面。不過，賽後卡雲尼接受訪問就企圖淡化事件，話因為兩隊都上晒身，有衝突在所難免：「呢場係一場好經典好激烈嘅南美波，雙方表現都好好，大家都好積極去踢呢場比賽。」
停賽復出火氣重
美斯喺六月美洲盃輸波後，批評南美足協腐敗無能，結果被罰停賽三個月。唔知美斯係咪仲為呢件事耿耿於懷，復出後都特別火爆，佢上周友賽巴西嘅時候已經同巴西教練迪堤嘈過，當時迪堤喺場邊話美斯插水，美斯就做手勢叫迪堤收聲。不過，美斯呢2場對住2支南美強隊都有波入，換個角度諗，有火又有貨交，總好過成日頭耷耷話要退出國家隊嘅。