昔日邵氏動作演員，曾拍攝《獨臂刀王》、《山狗》等電影的資深動作演員陳星，今年9月4日在印尼耶加達離世，享年81歲。
資深作家和編劇沈西城昨日接受《蘋果》訪問，證實陳星死訊，他說：「9月4號過咗身，因為佢太太打電話畀吳思遠話佢過咗身，吳導演就話畀我聽。佢舊年返過嚟同我哋一班人飲茶，瘦咗成個碼，我認佢唔到，以前粗獷之氣都冇晒，我問佢有冇事，佢仲話冇事，起身畀我哋睇，唔知佢突然間今年9月4號就過咗身，一路都冚住，直至佢太太搵導演（吳思遠）想攞啲片段喺悼念會度放映，咁先知道佢過咗身。佢有乜病就不便追問啦！」沈西城表示跟陳星不熟，但去年見面發覺很談得來，他說：「佢知道我行路唔係幾好，教我倒後嚟行會醫番好，佢話自己都係咁，喺羅馬鬥戰場都係用呢個方法，每日行半粒鐘好番。」
邵音音讚好好先生
邵氏出身的邵音音昨回覆《蘋果》說：「佢喺台灣走咗兩個月今日至知，同佢好熟好熟，大家邵氏人，不過少聯絡。佢好好先生成日都笑笑口，個樣兇神惡煞係拍戲做出嚟箒，佢非常好人，成日都笑。記得佢同羅烈一樣都係印尼華僑。」
而跟陳星同期出道的姜大衛，昨日接獲陳星離世消息，深感愕然和難過，姜大衛說：「我唔知呢個消息，同佢好多年冇聯絡，佢曾經去過台灣發展，退咗休好耐。不過以前我哋好friend、好老友，佢好玩得，又大隻又打得，聽到呢個消息都好突然好可惜，其實我哋呢個年紀，聽到乜人走都會唔捨得，心入邊覺得唔舒服。」
其實，去年11月初，陳星與另一名昔日邵氏的武打演員王龍威飯敍，王龍威更在社交網貼上二人合照，更留言指陳星精神依然不錯，想不到未夠一年卻傳來陳星離死的消息。
赴台發展曾任武指
陳星於1938年出生，為印尼華僑，60年代加入電影圈，與王羽、姜大衛等同期出道，同為導演張徹的弟子，主要擔任配角，代表作品有《山狗》、《十三太保》、《報仇》、《蕩寇灘》、《猛虎下山》及《餓虎狂龍》等，其中1972年接拍由吳思遠執導的電影《蕩寇灘》，與陳觀泰一起擔任男主角，電影上映後票房大賣，其中最後一幕更被喻為武打片的經典，亦令陳星一炮而紅。
之後陳星更有機會到台灣發展，不過只是參與小本製作，對發展沒大幫助，1980年陳星開始轉型，參與莊靜而、鍾保羅等主演的港產cult片《山狗》，陳星在戲中飾演莊靜而及艾迪的父親。1984年陳星返港重投恩師張徹懷抱，也有參與其他公司的電影，包括在電影《最佳拍檔》扮演黑社會大佬，與許冠傑及麥嘉等做對手戲，亦曾為《大地雙英》、《唐人客》擔任動作設計，1996年陳星離開影壇後移民加拿大，自從銷聲匿迹多年。
採訪：魯吉