理工大學俾差人團團圍住，社會各界不斷呼籲保護理大同學，希望斡旋事件，咁一向做開鍵盤戰士嘅理大最知名校友前特首梁振英呢？佢似乎唔多關心師弟妹安危，反而掛住抽泛民水。其實689抽政治水八方預咗，但如果為求抽水，連自己友都唔放過，甚至暗示叫人舉報同路人，又講唔講得過？
話說法律界立會議員郭榮鏗指解放軍自發喺軍營附近清除路障違反《基本法》，689噚日喺facebook發文想寸郭榮鏗，佢話喺社交媒體片段「見到很多西方人穿着西裝、拿着公事包，在上班路上幫手清除路障」，點睇呢啲人都唔係香港永久居民，應該憑工作簽證喺香港工作，如果佢哋唔係以「馬路上清除路障」申請工作簽證，而係金融、法律等專業，「這些人是不是觸犯了入境處的居留條件？」想寸郭榮鏗大細超！
但有政圈中人話，日前係藍絲發起清路障，而藍絲一定係689自己人，若果有外國人肯同藍絲一齊行動，點計都係同路人、認同藍絲行動啦！但689為咗寸郭榮鏗，竟然話自己同路人觸犯咗入境處居留條件，係咪為求寸民主派，不惜連同路人都擺上枱先？