人在他鄉聽到兩句廣東話會幾開心，不過律政司長鄭若驊就應該唔係咁諗。話說佢上星期四去英國倫敦出席講座時，俾幾十名香港抗爭者包圍，狂鬧佢「殺人犯」三分幾鐘，仲狼狽跌倒。唔知鄭若驊係年紀大，定係仆出國際心情未平復，律政司噚日發稿話佢仍然未康復，仲需要接受治療！
八方睇返當晚段片，條街黑媽媽都仲鬼咁亂，不停有強光電筒照住，唔講仲以為係香港街頭PoPo又鬧事呀，只不過英國係唔會有PoPo幫司長放tg趕人。鄭若驊仆親之後好似冇乜嘢，但律政司發言人噚晚話佢傷後需要接受治療，仍然未康復！又話諮詢醫生意見後有進一步消息會適時交代，但司長又可以繼續處理公務喎！咁究竟佢係嚴重定唔嚴重呢？有政界好事之徒話，𠵱家中環日日有「和你lunch」，鄭若驊唔返中環好正常，佢始終咁大個目標，萬一俾人搞到再仆親就嘛煩喇！
林鄭探中箭PoPo十分鐘
鄭若驊仆親少少都咁嚴重，唔知特首林鄭又有冇慰問呢？不過對比鄭若驊，777梗係更關心差人啦！所以喺理大小腿中箭受傷嘅PoPo就獲得特首10分鐘寶貴時間探望。噚日朝早，林鄭同保安局長李家超突然現身廣華醫院，事前冇通知傳媒，行蹤鬼鬼祟祟，記者跑慢兩步都幾乎埋唔到身。有記者成功問林鄭「（理大事件）除咗譴責仲有咩行動？」林鄭冇回答就上咗車，呢一幕令八方諗起老董當年開行會，記者問佢乜嘢佢都反問人食咗早餐未，結果有次記者問佢除咗呢句係咪冇其他嘢好講。777咪好似老董咁，除咗答譴責，仲有乜嘢識講吖？
李八方