連續缺席2016年歐國盃同18年世盃決賽周後，荷蘭終於重返大賽舞台。上禮拜六歐國外C組賽事，荷蘭作客同北愛爾蘭踢成0:0後，同埋小組贏波嘅德國雙雙出線。雖然荷蘭只能賽和北愛兼退居小組次席，但賽後隊長華基爾雲迪積克（VVD）都話呢場過程唔重要，最重要係拎到出年歐國盃入場券。
德國四蛋大炒白俄
今場兩隊都錯失過入波機會，荷蘭喺上半場10分鐘，貝侯斯接應昆斯普美斯禁區左路底線傳送，門前搶點快腳施射中楣彈出。冇耐荷蘭嘅祖爾韋特文犯手球，北愛獲12碼機會，可惜隊長史提芬戴維斯操刀竟一飛衝天。換邊後，雙方嘅進攻都唔太入肉，比賽最終0:0完場。賽後，小組排第二嘅荷蘭，因領先北愛三分兼對賽成績好啲，確定取得出線決賽周嘅資格，同組嘅德國就喺主場4:0大炒白俄羅斯，壓過荷蘭上榜首兼齊齊出線。
自從喺14年世盃勇奪季軍後，荷蘭連續喺16歐國外同18世盃外出局，今次重返大賽決賽周，VVD喺賽後都難掩興奮心情：「賽前都知呢場會好難踢，但我哋最終達到出線嘅目標。點樣過關唔重要，最重要係我哋已經殺入決賽周！」荷蘭教練朗奴高文都認同：「球隊當然係想不斷進步，但同德國及北愛爾蘭同組，晉級已經好美妙，我覺得大家可以忘記呢場比賽嘅過程喇。」
傳朗奴高文教巴塞
朗奴高文教荷蘭之前，喺17/18球季執教英超愛華頓，可惜開季9場只得8分，10月就被炒魷。佢三個月後決定執教荷蘭，入主後為橙軍大換血，果斷放棄表現欠佳嘅老將，重用本土青訓球員如法蘭基迪莊、馬菲斯迪歷特等。早前已經帶領荷蘭殺入歐國聯決賽，加上今次歐國外出線，朗奴高文可以話係「鹹魚翻生」。有傳巴塞隆拿想搵佢下季頂替華維迪領軍，有趣嘅係，原來朗奴高文同荷蘭嘅合約有項特別條款，就係帶荷蘭踢完下年歐國盃後，假如佢收到巴塞邀請佢又接受嘅話，荷蘭就要無條件放人，睇嚟執教球員時代效力過嘅巴塞，先係朗奴高文嘅終極目標。
