曾國祥同王敏奕拍拖六年，今年9月喺日本結婚，返港之後補辦入紙註冊，正式成為合法夫婦。升呢做曾太嘅王敏奕唔只做個好老婆，仲乖乖做個孝順新抱仔，甚得老爺同奶奶歡心。近月來嘅逆權運動，導致多區催淚彈「放題」，空氣污染加上社會氣氛低迷，令唔少市民減低外出意欲。不過，噚日曾太王敏奕就現身跑馬地養和醫院，早前老爺曾志偉開到口講想佢哋快啲添丁，以為佢哋咁快造人成功，王敏奕穿上乾濕褸，有遮肚之嫌，不過佢笑笑否認。
曾國祥做司機
原來王敏奕同曾國祥嘅細佬曾國猷陪曾媽媽宋麗華到醫院，老公曾國祥負責做司機，親自載佢哋到醫院，不過全程未有落車，放心由王敏奕陪住細佬同媽媽，似乎王敏奕都甚得奶奶歡心。
略帶倦容嘅曾媽媽戴上口罩，身上掛住一部迷你空氣淨化器，由王敏奕同曾國䣭陪佢步入醫院。王敏奕初時見到傳媒表現愕然，其後大方接受訪問，佢透露陪奶奶到醫院做身體檢查，問到奶奶嘅情況？王敏奕笑住回應：「冇乜，好好。」約十五分鐘之後，曾國祥折返接載家人，果然夠晒二十四孝。
撰文：馮仁昭