執雜佬，還有一名叫順記，他身形高䠷，可能是全行最瘦。當初由外父帶入行，再另起爐灶，一做便是43年。順記每天早上會送貨到三間粉麵店，當中以源記叫貨量最多，而另一間則是位於長沙灣的德記，牛雜製法是潮州滷水style，有別於街頭五香版。德記由一個潮州家庭經營，多年來從沒接受訪問，它的一碗新鮮牛雜麵應該是全港最平，只賣28元。「我哋做街坊生意，寧願薄利多銷。」老闆阿芬說。
「爸爸有七個仔女，差不多全部喺度做嘢。我哋通常輪班制，女人日頭，男人夜晚。」最初他們在李鄭屋邨前身的徙置大廈開車仔麵店，重建前是七層高的住宅區，生意很好，但後來媽媽過身，爸爸再娶，兄弟姊妹便各散東西。「嗰時好後生，大家唔甘心賣麵，小朋友唔會睇得起呢份工作。三哥同其他哥哥始終係潮州人，希望承傳爸爸賣嘅嘢。嗰時爸爸死咗，就用佢個名，喺角落位再賣牛雜麵。三哥係隻八爪魚，要捉我哋兄弟姊妹返來。」阿芬說。
客人指定肥腸麵
1998年幾兄弟姊妹重新走回一起，那時落戶砵蘭街，全盛時有四間舖，但很辛苦，生意時好時壞，最後剩下這間，仍是一家人做，不變的還有多年來指定要用新鮮牛雜。「新鮮同雪藏，一食就知係兩回事，通常新鮮牛雜來貨時，要用大滾水出水，放入去煲香料，通常會有磨豉、沙茶醬、玫瑰露，都會用爸爸傳承落嚟嘅配方。腸的肥膏不會挑走，其實都有客人指定要肥腸麵，鍾意牛腸嘅甘香、肥膏嘅感覺。而家牛已經少，牛雜就少，新鮮牛雜更少，鮮牛雜係香港特色之一，我哋唔會唔賣。」阿芬說。
德記粉麵茶餐廳
長沙灣青山道168-170號
記者：何嘉茵
攝影：Terry & Ming