「大隻B」係娛樂圈小鮮肉，花邊新聞當然唔少，除咗同「火辣妹」傳緋聞外，最近又被指搭上「影壇阿姐」，真係老嫩通殺。大隻B有父蔭，算係家底唔錯，每個月有樓收租，即使佢唔撈娛樂圈都生活無憂。不過咁大個仔，始終有夢想，當然想事業更上一層樓，年前佢發生意外，好彩最後救得番，話晒係塞翁失馬焉知非福，突然多咗好多人識佢，仲忽然做男神。
人氣升咗，理論上大隻B嘅工作自然會多咗，但公司反而擔心佢體力應付唔到。Jessie有次同班幕後人員吹水，大隻B原本獲公司安排去非洲拍旅遊特輯，仲同緋聞情人火辣妹拍住上，但臨出發前，高層突然有新指令話要換人，原因係驚大隻B頂唔順當地炎熱天氣，仲要捱更抵夜，怕佢又出事，又難買保險，最後惟有換人。
大隻B事前已經做咗好多準備工夫，突然冇得去當然失望，但最估唔到嘅係火辣妹夠義氣，知道大隻B冇得去，亦堅持唔換拍檔，寧願陪埋一齊唔去。有冇懲罰？火辣妹話晒係上位花旦，所以都可以有say，最後派咗另一位小生同新晉女神一齊去，個組合雖然有啲九唔搭八，但旅遊節目要求又唔使咁高嘅。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。