上周五歐國外J組賽事，上輪已提早出線嘅意大利作客3:0炒波斯尼亞，意軍喺文仙尼帶領下，打破咗80年前嘅9連勝紀錄，締造國家隊史上最長嘅10連勝。意大利嘅10連勝，由上年11月友誼賽贏美國開始，加埋歐國外抽靚籤，希臘同芬蘭已係同組最強對手，今場開波前已喺分組賽八連勝。結果意大利今場喺21分鐘，由中堅法蘭斯高阿沙比禁區內轉身一射得手，之後恩斯治尼增添紀錄到2:0返更衣室。換邊後，比洛迪禁區頂起腳，個波直飛死角破網，結果意大利3:0搞掂對手。
3:0贏「波」再現鐵血防線
意軍教練文仙尼藉呢場勝仗，打破咗前人保素喺1938至39年保持嘅國家隊最長9連勝紀錄，為意大利取得史上首次10連勝。佢賽後就話：「我好開心能夠創造呢個紀錄，不過要超越保素單單咁樣係唔足夠，仲有好長嘅路要行。」文仙尼破紀錄都咁謙，係因為保素曾經喺34及38年帶領國家隊2奪世盃，要超越佢的確唔容易。
其實文仙尼自去年五月領軍開始，意大利嘅表現的確比之前好，對住強隊都唔太失禮，試過同歐國盃冠軍葡萄牙打和，而且喺佢執教嘅18場入面只係輸過2場，當中只有1場失多過2球以上，更有九場零封對手，重現佢哋防守大國嘅風範，睇嚟意大利喺文仙尼帶領下成功復蘇，下年決賽周唔可以睇少佢哋喎！
芬蘭首入決賽周似贏世盃
除咗意大利破紀錄，同組嘅芬蘭亦都歷史性打入國際大賽決賽周。芬蘭憑杜文倫喺上半場先開紀錄，加埋諾域治前鋒迪姆普基下半場梅開二度，主場3:0大勝列支敦士登確定次名出線，同意大利一齊晉級下年決賽周。原來芬蘭曾32次挑戰國際盃賽決賽周，可惜全部都喺外圍賽失敗收場。今次創歷史首次成功出線，所以完場嗰陣主場嘅球迷衝晒入場慶祝，場面好似捧走世盃咁開心。