求驗客手記：美斯復出戰射爆巴西終「捧盃」

巴西同阿根廷上禮拜六喺沙地阿拉伯踢友賽，今夏因鬧爆南美足協貪污腐敗嘅美斯，停賽三個月後復出。開賽10分鐘巴西先得12碼，點知加比爾捷西斯竟然射咗出界；美斯3分鐘後就博到12碼，主射雖被艾利臣比加撲出，但佢及時上前補中射入，結果阿根廷就一球小勝巴西，美斯就做埋贏波英雄捧到個盃仔（圖）。美斯入波之後，有鏡頭影到美斯向場邊，做出叫人收聲同安靜嘅手勢，原來係巴西教練迪堤投訴美斯插水，不過美斯似乎一於少理，仲話贏到巴西永遠都係好事嚟喎！

至於射失12碼嘅捷西斯，佢踢嗰隊曼城早前向體育仲裁法院上訴，阻止歐洲足協繼續調查球會財政狀況，惟上訴上周五被駁回。歐洲足協早前確認曼城支出超標，曼城若罪成下季或冇得踢歐聯。