報紙老總L來短訊質問：「你是否美化中大學生，內有分裂喎？」上星期三（11月13日），老友虎媽A有三位朋友說要到中大送物資兼幫手，虎媽A問左丁山點樣去，於是勸佢唔好，一來民眾送往之物資已經好多，二來交通擠塞，由九龍往中大需時甚長，虎媽A不依，說三位朋友好熱情，點都要想辦法到中大，係要去，左丁山教虎媽A如此這般搵行車路線，下午三點幾短訊回報：到了，但人太多，要排隊入內，門口有學生檢查背囊，排隊需時，不過人人唔介意，送物入內，此所謂民氣也，好多市民主動支持中大學生。故此左丁山回覆老總L：「冇美化，如實照寫而已。」
晚上虎媽A來whatsApp，幾長，大意話入咗校園後，佢睇到一啲事情令佢唔安樂，唔多舒服，例如有啲粗壯樹幹被鋸斷，路面垃圾多，校巴受塗污，司機好似係學生模樣……咁樣，啲校工、司機去咗邊呢？
左丁山一睇，暗叫不妙，立即周圍搵料，有不同書院職員回應，虎媽A冇講錯，事實如此，佢地在大學任職多年，知中大一樹不能斬，過往為起宿舍而移動樹木都畀學生抗議，結果改圖則相就，增加建築費成本幾百萬元。故此中大學生斷無斬樹之理，況且中大學生從來唔會去搶校巴揸車嘅啫。
哎吔，再找到曾在校園逗留兩晚幫手嘅年青校友一問（Fact check也），呢位校友B話確有其事，令佢擔心，但外來學生話山長水遠來中大幫拖，為保護中大校園而吃催淚煙，年輕人又曾誓言核爆都唔割席，中大學生感情上好難開口叫非中大學生回家園去，所以心情非常矛盾。校友B曾住宿舍，放假、周末都唔返屋企，對中大校園一草一木都有感情，好唔鍾意花草樹木草地畀外人有意無意破壞，佔中時候佢啱啱畢業，聽師兄講過一句：因革命而一起，因洗碗而分手，佢預料中大校園內即將會發生呢類事件，不少人情願視死如歸，但極不願去洗廁所嘅啫。
如此情況，難以持續，唔怪得除水警幫助內地生撤走之外，海外學生已由大學協助之下，撤離校園以至香港，宿舍內之教職員亦紛紛暫時搬出，故此，段校長於11月14日星期五公開信呼籲非中大生離開校園。此呼籲是必要的，因為中大學生會礙於「核爆不割席」的承諾難以啟齒，由校長叫一聲「送客」，當然合理不過。但是特區政府和警察不要以為青年學生由此分裂，可以漠視年輕人的訴求，今天香港之禍，正正是因為林鄭粗暴地忽視6月9日一百萬人和平示威之故。
非中大生（黑衣人）於星期五夜晚陸續撤退，崇基門外有大量市民私家車排隊撤走晒，散band速度之快，令人感到意外，星期六上午，校友A駕車回中大校園巡視，傳來大量圖片，校友A說：校園平靜，道路仍然難行，崇基破壞最多，新亞聯合基本上無事。校友事務處又發過訊籲請校友不要趕返校園幫手，因校內員工會忙一段時間，不甚方便也！