反送中運動持續至今逾五個月，香港經濟受影響，市民消費意欲極低。袁彌明旗下的十間店舖生意也有影響，但她卻未有抱怨，旗下店舖更曾於6.12、8.5及上周一也曾經罷巿。Erica日前到銅鑼灣店巡舖，她說：「生意受影響一定有，大家冇消費意欲，唔敢出街，我作為上巿公司要對股東負責。呢個抗爭運動，每個人都要付出唔同代價，生意人係付金錢上嘅代價，比起成個運動，呢啲損失只係微不足道。我哋又唔係幾百間連鎖店，好好彩我哋咁多年又唔係主打做內地人生意，𠵱家自己生意自己撐。」
保員工飯碗
Erica覺得逆巿對名牌店衝擊最大：「着咁靚做乜呢？周圍都係催淚彈。」她也有想辦法救巿：「做多啲優惠，我係見步行步，冇計劃書，我都唔知（社運）幾時先完。畀多啲方便客人，如果佢哋唔鍾意落舖頭，我哋咪幫佢哋送去屋企，加強網上商店。」警民衝突會令商場隨時關門，Erica直言：「商場關門嗰日生意係零，反蒙面法施行日（上月5日）最大影響，我十間舖全部閂晒，突然一個咁大法例冚埋嚟，大家唔知係咪戴口罩就會俾人拉，好迷茫。」Erica慶幸有些商場體諒租戶願酌量減租，她表示無論多艱難都要保住員工飯碗：「員工自己有家庭負擔，我寧願開源節流，同人冇關嘅成本要節省多啲。」