曾參演劇集《導火新聞線》的前港視藝人關伊彤，與老公林紹奎（小巴）育有兩女，早前成功懷有第三胎。她前日入院，晚上順產誕下重約7磅囝囝，母子平安，並改名Terrence。
喊聲特別大
社運持續，網民上周發起大三罷，各區都出現堵路情況，36歲的關伊彤都擔心臨盆時若遇上交通阻塞，會延誤入院，又擔心遇催淚彈，因此跟老公商量後，先搬到醫院附近的酒店入住待產。她前晚在社交網報喜，昨接受本報電話訪問時，指小寶寶算是亂世出生，她說：「酒店住到第二晚就生得，三公子喺亂世出生，我冇特別期望，只想佢健康愉快成長。」
問到生產過程，關伊彤透露老公有陪入產房，由於有過兩胎經驗，她表現淡定：「生呢胎比之前生兩個家姐時間較長，我見紅先入院，仲去買咗個飯食埋先。等陣痛好耐，生呢胎有少少辛苦，我冇打催生針，生完因為胎盤未清得晒，我仲要留喺產房度等。囝囝喊聲特別大，爸爸聽到話佢脾氣都好大吓。」
吩咐剪指甲
關伊彤更大爆老公趣事，她說：「我生大女時，老公陪我入去，我痛時捉住佢手，佢俾我𢱑損晒，今次生時，佢提我要剪指甲，怕我又𢱑損佢。」她指囝囝樣子較似爸爸，今次追仔成功，她決定封肚，又笑言：「二家姐見到細佬剛出世個樣，BB未收水，佢話佢成個洋葱，改佢花名做洋葱頭。」
採訪：陳杰