歌手梁釗峰和黃妍踩過界演出舞台劇《無法成長的我們》，透過故事講述如何追逐夢想，以及過程中的種種經歷。日前二人在新蒲崗的排練室接受《蘋果》訪問，大讚故事切身兼貼地，釗峰說︰「經歷多一次人生。」黃妍坦言看到對白時感動流淚，因為昔日走音樂路時曾遭父母反對，年輕人追夢的壓力，她感同身受。
撰文：曹家誠
攝影：仇志德
梁釗峰和黃妍在《無法成長的我們》中分別扮演25歲及30歲的角色，20歲的角色則由另一演員王柏霖飾演，故事由商台DJ阿檸和導演馬志豪聯合創作，釗峰表示：「知道阿檸用咗好多時間創作，題材好貼地寫實， 即係追夢嘅過程同追求嘅目標，唔係乜嘢驚天動地嘅大事，反而咁樣會令到件事更加寫實。」他坦言音樂路難行︰「其實好難令到父母完全理解，好彩屋企人支持我嘅決定，而且我當年加入C AllStar後，好多嘢都有另外三位兄弟陪住我一齊面對。好彩係經歷完，𠵱家父母已經理解，整個過程佢哋都感受到我係認真行，個角色就畀我經歷多一次人生。」
嗌交功力提升
黃妍表示細讀劇本時，被當中對白感動到流淚：「因為講追逐夢想，自己就會諗起父母曾經對我講過類似嘅說話。」她指追逐歌手夢初期，未獲家人支持，她說：「父母出發點係想我好，但表達方式唔同，佢哋想你行一條佢哋認為好嘅路，會講『點解唔搵份正正經經嘅工？追夢有乜用？』但自己就會覺得佢哋唔明白我嘅夢想，呢個就係矛盾點。」
除了講述夢想追尋，故事中亦有描述情侶間的相處，釗峰笑說：「我唔知阿檸點解會寫得出呢啲情節，可能佢經歷好多，兩個人相處就會牽涉到幾時結婚啦，住屋問題啦，呢啲都係大家香港人會經歷到嘅事。」他指愛與現實是矛盾重重：「劇中我同黃妍係情侶，好寫實講到雖然大家係相愛，但由於要搵食缺乏溝通，搞到關係變淡，所以我哋喺劇入面都有一場鬧交戲。」旁邊的黃妍笑言：「經過今次排劇，令自己嗌交功力大大提升，我以前嗌親交都輸。」
度身訂做歌曲
為了今次劇目，黃妍特地炮製主題曲《刮骨》，她表示歌曲是為劇本度身訂做：「每次談及成長，總會有一啲深到入骨嘅傷口，想移除需要好似刮骨療傷咁，但必須要記得你自己最深層嘅本性，要好好保留初心，我覺得首歌好配合到呢套劇嘅主題。」
【後悔冇學鋼琴結他】
梁釗峰和黃妍在成長過程中，為了音樂路不斷掙扎求存，不過當中難免有遺憾，釗峰憶述自己也有後悔的事情：「記得細個媽咪叫我學琴，但自己想學電結他，因為當時覺得彈琴唔夠有型，不過媽咪唔畀，話我太細個連結他都揸唔穩，最後兩樣冇得學，大個咗入行先發現其實係好大損失。」
黃妍認為在大學階段，除了讀書，並無參加任何課外活動是一大損失。當年她在樹仁大學讀新聞與傳播系，甚麼都想做想試，課餘時她不斷兼職，曾做過市場推廣、電台助導、報館編輯，又替學生補習，閒時亦會與朋友到街上busking，每天排得密麻麻，所以沒時間參加課外活動，現在回想起來，似乎未能盡情享受校園生活。
