中國喺周四世盃外作客以1:2不敵榜首嘅敍利亞，中國隊主帥納比喺賽後記者會憤而辭職，指球員們喺場上毫無鬥志。納比突然請辭殺中國足協措手不及，有指足協今次未必向外請主帥，反而會提拔下月帶領中國B隊踢東亞足球錦標賽嘅少帥李鐵接手，延續迷信洋帥失敗之後，又搵番土炮領軍，再貴價請新洋帥呢個循環。
納比：我人工高我孭
中國今仗早段就失守，被對方奧馬里接應傳中先開紀錄，雖然10分鐘後就憑武磊追平，不過張琳芃喺76分鐘擺烏龍，令球隊最終全失三分，賽後只得7分排第2，與第三嘅菲律賓同分，落後榜首敍利亞五分。賽後主帥納比喺記者會憤而辭職，佢斥責球員場上嘅表現：「球員喺場上又驚，又冇鬥志、冇欲望、冇膽，訓練嘅嘢完全做唔番出嚟！對手實力稍為好少少，我哋就踢唔掂。作為教練，我人工咁高，要負全責，我決定請辭。」然後佢就起身離開記者室。
一波未平一波又起，當晚中國足協喺微博接受納比辭職時，又被網民鬧用詞失當。中國足協喺段聲明度指球隊表現「差強人意」，被指正「差強人意」係指「大體上令人滿意」，如果足協冇用錯，即係佢哋咁都滿意球隊表現，結果網民留言大罵：「還勉強滿意？你也辭職吧」！「足協的人都小學畢業嗎」？
負敍利亞最多爭次名
今次已經係納比第二次同中國隊分道揚鑣，目前球隊仲有四場分組賽，但想首名出線已經唔太可能，惟有贏晒餘下比賽，爭取成為4支最佳成績第2名。好在下場分組賽要到下年三月尾先踢，足協有成四個月時間搵新帥。不過按慣例，中國足協重金禮聘洋帥唔掂就會試本土教練，有指足協今次打算提拔帶領中國B隊嘅少帥李鐵接手，可能係因為佢同過納比合作，唔使球隊喺短時間內大改踢法。