常說，通過高山低谷的人生歷練，會成就更好的演員。
余安安由第一代香香公主，到息影結婚、離婚獨力養女，今年人生進入新一階段：60歲。最近她在新片中飾演失去丈夫、人前故作堅強的女人，坦言將過去的經歷投入角色，「諗番嗰個moment係好傷心。」戲如人生，人生如戲，樂天知命的她，正向着更美好的明天。
採訪︰羅婉玲
攝影︰沈健程
余安安剛踏入60歲，身形樣貌依然保持得好，她早前因出海時不慎撻落海傷了肋骨，需休養三個月，笑言自己貪玩，「唔記得自己嘅年齡，以為自己仲係26對，嗰陣我點樣跌落水都唔記得咗，係人哋話番我知，撞到好似冇咗記憶，真係斷片，𠵱家康復進展好好，要小心啲唔好再撞到，唔係就好麻煩。」
清場釋放情緒
早前安安和契仔凌文龍在九龍灣接受《蘋果》訪問，不敢太大動作移動。過去幾年，安安由愛上舞台劇、客串拍片，到片約不斷，最近新戲《失蹤》演一名失去丈夫的女子，安安在片中丈夫因行山失蹤七年，連屍骨也找不到，過着人前堅強，人後獨自垂淚的日子。這樣的日子，安安在現實中同樣經歷過，兩度經歷離婚，1983年與周潤發閃電結婚，九個月後閃電離婚，1987年與拍拖兩年的李萬祺結婚，2003年離婚後，她和兩名女兒相依為命。「諗番嗰個moment係好傷心！」經歷種種，也豐富了她演戲的層次，她說：「讀完劇本後，自己都去諗吓點樣嘅狀態代入個角色，會適合啲。某程度上自己嘅人生，都有好多經歷，有啲擺番落去，畀自己一個感覺，然後進入狀態去演。」
問對哪場戲感受至深？安安不諱言：「自己喺間房時，間房係自己嘅private room，喺房內釋放自己嘅情感。」這場戲講述她失去丈夫後，表面上將丈夫的東西丟了，其實她收藏在鄰居的房間中。談到這場戲，安安有感而發說：「呢場戲我要求清場拍，好掛住一個親人，而你又唔知佢仲存唔存在，又裝扮到自己好硬淨，其實好唔開心，間房就係釋放情緒嘅地方。」
出一身汗減壓
為了投入演出，安安更刻意將自己弄得憔悴，「女仔都係貪靚，但個角色係個唔開心嘅人，唔會有心機去打扮自己，所以我好努力搞謝自己，唔做facial白頭髮唔染，飲吓酒皮膚又乾啲，夜瞓煲劇又會黑眼圈，咁樣會自然啲，花少少工夫，令自己狀態適合番個角色。」平日對自己外貌有要求，安安不時做運動減壓兼喼弗，「我會好投入去做，效果會好啲，出一身汗令你開心。」
安安今次再跟契仔凌文龍合作，凌文龍說：「場戲一分鐘唔夠，冇乜台詞，我哋好珍惜。」他在戲中演顧美華的兒子，因要照顧患阿茲海默症的媽媽，令他情緒起了變化，事前曾請教心理學博士，「拍緊嗰陣我啱啱搬屋，好多嘢搞好煩躁，又叠住兩部戲拍，拍戲要穿皮褸，又要跑山，嗰日拍又猛太陽，情緒好波動。」 至於怎樣減壓？凌文龍說︰「我鍾意打機，可以投入另一個世界，或者聽歌，但最有用係做運動，無論身體機能，定心理狀態會好快好。」
化妝︰Littlewhitemakeup
髮型：Kiulam of HairsalonHk
更多精采時尚內容，盡在 http://add.appledaily.com。