前晚特首林鄭月娥漏夜叫晒司局長去禮賓府開會，之後政圈廣傳政府會宵禁對付示威，一時間社會議論紛紛，因為咁對市民同商戶肯定有影響！所以噚日官媒《環球時報》突然係Twitter出文，話港府周末實施宵禁，好多香港甚至國際傳媒當「官方」發佈咁引用，冇人估到《環時》放流料，變成集體炒車。
《環時》噚日下午喺Twitter出文，話引述匿名消息人士指港府預計周末宵禁，不過就冇細節。消息一出自然震撼，雖然《環時》出Twitter前有傳媒引港府消息話唔宵禁，但《環時》話晒官媒，可信性肯定高，於是好多媒體跟住報，連彭博都出即時新聞。
點知唔夠一個鐘，《環時》火速刪文，即係話消息係流嘅，變相令信佢嘅傳媒集體炒車！《環時》總編輯胡錫進之後喺個人Twitter解釋，話了解後認為原先取得嘅消息不足以支持香港周末實施宵禁報道，所以要求編輯先撤文。
咁究竟《環時》收到乜消息？有傳媒行家同八方講，原來《環時》出文前，網上流傳一段偽造嘅now新聞，話港府周末實施宵禁，但now澄清冇出過呢段新聞，唔通胡錫進所講嘅消息就係呢段流料？