電影《葉問4》殺到，少不得又是揭殖民地之惡、歌頌強國之美，今時今日還有幾受？但市場西瓜倒大邊，它並非拍給香港看了。
葉問（1893-1972）大概屬於箭垛式人物──創作者把理想堆砌到他身上。早年問公曾赴港就讀聖士提反書院，我訪問過其長子葉準師傅，談起仍與有榮焉。追求學問、讀洋書，本來佳事；不知何故，改編成電影勢必加插遭洋鬼子欺負的情節，非常例牌。推而廣之，土豪二代現在負笈歐美亦如此，邊罵邊爭相出國，把當地說得像煉獄般不堪，把自己說得像漫畫華英雄般不屈，轉頭卻最驚被取消國籍或學籍，精神分裂。
對抗欺負，當然訴諸Chinese Kung Fu啦！Come on，一早不是賣豬仔華工血淚史年代，風水輪流轉，強國靠學習／抄襲西方科技，財大氣粗，反過來用錢撻番洋人都仲得，同胞尚不滿足，動口兼動手，誓以中國功夫攞彩攞到盡。中國功夫是否天下無敵？我不敢評論，且看那些頂尖MMA（綜合格鬥技）擂台，有多少擺出國術架式呢？掌法打擊力難道重得過拳頭？實戰不奏效，唯寄託於影視，方是功夫片永遠拍不完的原因。不只打鬼佬，更打飛機，自high也。
中國人平均比洋人矮，係事實，但格鬥比賽按體重分級，不存在大蝦細。偏偏像《葉問》這類電影，喜歡出現短小精悍中國人vs牛高馬大老外的畫面，突顯不公平，激起敵愾同仇，諗落天真，其實是自己設定不公平在先，輸咗有得賴，贏咗仲得戚，典型民族劣恨性。不過，牛高馬大的洋演員收足片酬，劇情叫他敗便敗好了，袋袋平安。
事情未完，還要講漂亮，幾時聽聞西洋拳、摔跤和柔道等要講漂亮？勝就是勝，但中國功夫，連無食過夜粥的女觀眾都滿口識批評好睇唔好睇，功夫片遂有動作設計一職，設計出來的，剩餘幾許寫實？
我相信中國功夫，正如我相信各國功夫各有所長。標準西洋拳由英國人確立（1881年首間業餘拳擊協會成立），幾時聽聞英國人會拍套戲用boxing打低詠春，才等如愛國？
民智漸開，渲染華洋矛盾、被害意識繼而阿Q式精神勝利，恐皆不合時宜。唯一解釋，果然拍給大陸看。
真正問公，為投奔自由來香港的。