甄詠珊曾經用「朋友以上，戀人未滿」來形容與林雲中的關係，呢段姻緣以為可以修成正果，點知日前佢喺社交平台暗指林雲中「忘恩負義」。甄詠珊噚日以美容代言人身份現身會展，兼首播佢嘅新歌《Queen Of Your Life》MV，對於現時嘅感情狀況，以及「忘恩負義」一事，佢收起笑容指過去嘅事唔想再提，要展望將來。
「曾經好欣賞佢」
同林雲中劃清界線，甄詠珊指佢哋冇拍拖，佢話：「曾經好欣賞呢個人，好支持佢，有嘗試去了解吓，但發現思維唔係同一條線上，價值觀又唔同，佢抹殺我對佢嘅幫助，冇感恩，不過唔緊要，都係了解嘅一種，用時間去了解都要。」佢又表示現階段要努力工作，等啱嘅人出現。
甄詠珊提到為美容代言，曾經親身試打透明質酸針，感覺同平時打針一樣，用咗之後腮骨位變細。佢透露今次同廣告商倉促合作，三星期內完成接受打針、拍廣告、錄廣告歌同拍攝MV，佢話：「首歌講世上冇醜嘅女人，只有懶嘅女人。」剛拍完網劇嘅佢，喺劇中飾演男仔頭兼有同性密友嘅角色，佢話：「冇明確交代係同性戀，反而同李明憲有床上戲，不過只係攬吓。」
撰文：馮仁昭