舉長槍指向市民而喺內地封為英雄嘅「光頭劉Sir」劉澤基，之前佢話放棄安排仔女去新西蘭升學，改為去大陸讀書，原來佢一早喺大陸買晒樓，仲要係中山區同珠海區嘅豪宅。
最貴單位千萬人仔
其實一早有傳光頭劉Sir喺呢兩區買樓，八方致電向當地中介八掛吓，有珠海中介話佢唔只買樓，仲要係買叫做「龍光玖龍璽」嘅樓盤。八方網上睇嗰個樓盤，最貴一個單位要賣1,000萬人仔（約1,100萬港元），當地買樓要比五成首期，光頭Sir分分鐘畀咗500萬（約557萬港元）首期。警方日日催淚彈「放題」，光頭Sir就瘋狂睇樓，連內地網民都打出問號：「同仁在一線，他去買房？」
微博流傳圖片，光頭Sir曾參觀位於金灣區的「龍湖龍光首開‧湖城大境」，見到佢舉晒拇指影相。珠海地產經紀陳小姐（化名）同八方講，光頭Sir唔係買嗰個樓盤，只係佢睇樓嗰時有人同佢影相，佢真正買咗橫琴新區嘅樓盤龍光玖龍璽。「廣告費就不知他收了沒有，反正朋友圈有宣傳」，陳小姐話周邊配套都是頂級，包括學校及醫療「都是很貴的」，屬豪宅區。
中山的多個地產微博亦傳出光頭Sir買咗中山坦洲的金帝世紀城，微博話係「真豪宅」。中山創立俊聯地產的港人張敏銳同八方講，金帝世紀城唔算豪宅，只係當地中型檔次住宅，每平方米1.7萬（1.9萬港元）至1.8萬（2萬港元）。據佢估計，如果光頭Sir要喺中山返葵涌警署，要1小時34分鐘，唔知佢係咪真係會長居大灣區呢？光頭Sir買樓睇樓得咁開心，對唔對得住前線警察呢？
李八方