林欣彤（Mag）最近積極為下月舉行的演唱會作準備，日前抽空接受《蘋果》訪問及試咪唱時，唱片公司特地安排當年她參加《超級巨聲2》的兩位司儀森美及田蕊妮（阿田）現身，為她送上驚喜。Mag坦言做歌手後比以前大膽，阿田就大讚她的聲線有力量，更即席傳授她減壓方法。
林欣彤試咪唱的歌單分別有A-Lin的《愛請問怎麼走》、張惠妹的《聽海》，以及她自己兩首作品《一千零一次人生》及《忍》，當她唱出《聽海》時，躲在密室的森美和田蕊妮突然出現，令Mag既驚且喜。她笑謂︰「好驚訝！只係表面冷靜mode，第一秒以為啲音樂錯咗，好開心，阿田同森美喺旁邊，好有熟悉感覺，嗰時唱歌前同唱歌後，佢哋都會企喺我側邊問我嘢。」
做運動迎戰
森美與阿田在密室透過手機看Mag唱歌時，感覺她信心比以前大，還笑她夠膽在台上「指指點點」，Mag坦言比以前大膽：「以前冇諗過做歌手，只係好鍾意唱歌，畢業就去比賽，怕之後返工會冇機會，因為每次都唔知會唔會被人foul，所以每次都當最後一次唱，𠵱家係職業，對自己要求會高咗。」
Mag首個售票演唱會本來去年舉行，可惜因為病倒取消。相隔一年，狀態大勇的她說︰「上年身體好差，今次盡量做運動，食得健康，希望有最好身體同狀態，有少少壓力，但可以推動吓，鍛煉多啲。」
阿田教減壓
憶述當年參加比賽的Mag，森美笑說：「初初未有太留意佢，唯一留意係佢嘅低音，同埋佢着黑絲襪。」阿田則指最記得Mag當年「PK」：「佢喺PK賽唱G.E.M.嗰首歌（《A.I.N.Y愛你》），佢嗰組本來唔高分，佢係一嘢救全家。」阿田又以「靈魂注咗入一個錯嘅身體」來形容Mag，指她又瘦又細粒，但開聲就好powerful，唱歌有信心。
阿田又以過來人身份教Mag減壓：「之前我開第一個售票演唱會，初初都好大壓力，中後期好輕鬆，連老公都問我點解，因為我諗通咗，呢個世界唔好睇嘅show好多，多我一個唔多，就係咁，壓力冇晒！」
撰文：曹家諴
攝影：仇志德
場地提供：谷Stage