首屆改制後嘅西超盃周一抽籤，巴塞隆拿會喺四強硬撼馬德里體育會，而皇家馬德里就會同上屆西盃冠軍華倫西亞交鋒。西超盃今年改制，比賽由上季西甲頭兩位球隊，同埋上季殺入西盃決賽嗰兩隊去海外踢，而且改喺歇冬期嗰陣搞，而首屆就確定會喺沙地阿拉伯上演。如果巴塞同皇馬都晉級，呢場海外踢嘅國家打吡（圖）可以話係球迷最期待嘅決賽。