2019年的香港「殤十一」，只有三槍帶來的心痛，哪來購物的心情。
平行時空下，中國人繼續爆買，天貓雙11交易額繼續破紀錄，全日2,684億元人民幣，按年增長有成26%。喂喂！說好的中國經濟下行，通脹創六年新高呢？
係啦，好神奇呢……然後就有人發現，淘寶雙11過去十年數據，都分佈喺三次回歸曲線上，擬合度均超過99.94%，幾乎為1。早於今年4月，就有人推算今年全日交易額約2,684億，果然，同最後官方公佈數據只差5億。咁當然，阿里就一定否認啦，表明「造謠要負法律責任。」你有你質疑，佢有佢否認。講到最後，都係睇你對阿里信心有幾高。
英用百年時間建立嘅香港國際金融中心，未來國際投資者，會唔會繼續投資香港，要睇嘅，一樣係睇港府公信力。不過問題係，我哋香港所謂嘅官，仲信得過咩？近幾個月所有嘅反應已係醜態百出…盡顯香港高官早已五毛化，即係咩？不理事實，總之「我話係就係啦！」
穆迪和惠譽9月時，將香港評級展望下調至「負面」，其中穆迪原因係，質疑持續的反修例示威，正侵蝕本港制度優勢，加上本港政府及政策執行效率，低於該機構此前作出的評估，均有損香港作為貿易及金融中心的吸引力。一個國際評級機構講到咁，即係話你廢！
但不過林鄭一句就話：不認同穆迪「負評」，仲話香港的「一國兩制」、法制等基石仍然堅挺。至於陳茂波又話，不認同穆迪推論，認為欠缺事實根據。你廢，大家係有眼睇，唔係你話「i dont agree」大家就覺得你唔廢。再者，一方面成日話「暴動拖累百業蕭條」，一方面「我唔認同經濟負面前景」咁即係想點呢？鬧「暴徒」時就經濟差，你畀人鬧時就經濟好平穩嗎？
再來，商經局局長邱騰華，最近已抽李嘉誠水，話李嘉誠「應急錢」同港府推旅遊業支援相似，「體現了香港同舟共濟的精神」，本來抽水已經核突。再數返早前《香港人權及民主法案》討論呢單國際大事，當時邱局長係點回應呢？佢話「獨立關稅區地位係《基本法》賦予香港。」喂咁好笑嘅你，即係有人當你係朋友，賣嘢畀你一向畀友情價，然後有日人哋同你反面，你堅持要友情價，話「呢個係我阿媽賦予我用友情價地位。」
香港人反抗，連中環OL都要上裝備擋催淚彈，原因已唔再係流於上唔到車買唔到樓嘅層面，而係驚香港丁蟹式言論變常態，指黑為白，狡辯成習慣。最好笑係，據消息，林鄭班高官，仍然認為今次運動，係美國搞出嚟嘅，喂，你返落嚟地球未？香港行政長官是如此智商，你會認為誰會對香港有信心，而香港國際金融中心，是毀在誰手？
千頌C
http://fb.com/winbigwok
本欄逢周三刊出