特首林鄭月娥自從獲國家主席習近平接見，對香港示威鎮壓不斷升級，連續兩日在香港金融核心中環鎮壓示威，昨日更派龐大警力進攻中大，季陶一些在中環上班專業、金融人士、以致大班中大校友，無不義憤填膺，部份原本屬淺黃的人，也變成深黃，無不大罵林鄭及北京，有金融朋友說，林鄭再為北京「製造」一批新「敵人」，「呢班人仲要係社會精英、學術、專業界人才，佢哋一定會記住一切，中共將會永遠失去呢啲精英支持」。
有昨日在中環抗爭的專業人士稱，昨日走上街的不乏專業、金融精英，「我同事原本只係淺黃，前日見班警察亂嚟、完全癲咗咁，噚日忍唔住落去撐，佢事後大鬧班警察黐晒線，話呢世唔原諒警察」，他的同事又說昨日在中環示威不乏外籍金融從業員，「班外國人都喺度鬧，話香港再唔係開放國際金融中心，而係警察國家」。
辣着學者拒再合作
該專業人士稱彭博等外媒昨日也大篇幅報道警察在中環鎮壓示威，「呢個殺傷力之大，足以毀咗香港國際金融中心地位，冇咗香港同大陸吸外資同美金，睇中共經濟點死！」
但想不到林鄭中午打完中環，即又以龐大警力進攻中大，季陶一班中大校友朋友，一邊趕回中大聲援，一邊大罵林鄭及警察，有中大校友對季陶說，連一些過去與北京、港府還算「有偈傾」的中大校友，今次也被「辣着」，直言以後與北京、港府割席，「其實中大一向係科技研究同內地有好多合作，有啲敏感項目都係透過中大學者做平台，安排外國同大陸合作，今次咁搞中大，辣着成班中大人，以後唔使再諗合作」，直指林鄭及警察為北京種下仇恨，「比梁振英加董建華仲多」。
季陶
周一、三、五刊出