歷史罪人林鄭月娥全力毀滅香港，而過去兩日失控警察由早到晚喺鬧市亂射催淚彈，唔少返工返學朋友都慘被毒害，但林鄭一於少理，噚日講明唔會停工停課，原因竟然係諉過抗爭一方，指摘有人搞「三罷」製造香港停擺現象，所以停工停課就會跌入圈套。
究竟係跌入圈套定為大家健康着想？公道自在人心！777從來只會出賣港人，佢當然唔會為大家諗，反而佢就「跌入圈套」幾多次都冇所謂，甚至俾人鬧龜縮都冇問題，最緊要自己安全嘛。
多人保護 聲大大返工
睇番今年7.1回歸22周年，當時逆權運動仲未滿月，但777就「跌入圈套」，唔想畀網民製造衝擊升旗禮現象，將金紫荊廣場升旗禮搬入室內，又取消公眾觀禮同踢走制服團隊參與，寫下回歸後先河；到咗十‧一就一早取消煙花匯演，升旗禮亦故技重施再喺室內搞。
佢為咗避免同市民接觸怕被圍堵，其他活動都隨時唔到，好似曾經應承出席母校嘉諾撒聖方濟各學校校慶活動，結果臨時失蹤；之後書展開幕，777亦一改往年做法缺席，唔通佢係「跌入圈套」成癮？話時話，今年年宵宣佈取消乾貨區，唔知777又會唔會訓示食環署，點解「跌入圈套」呢？
而八方喺記者會後途經政總範圍時，發現政總外停咗部水炮車，仲有多個穿着印有簡體字「單兵防護組件 廣州衛富科技開發有限公司」黑色背囊嘅防暴警員，手持多袋裝備準備出勤，原來政總有咁重兵保護777，唔怪得佢今次咁口響，大大聲話唔「跌入圈套」要返工，原來佢𠵱家有多人保護。
李八方