趣趣地：史達寧「私了」高美斯被英軍停賽

英格蘭國家隊禮拜一集訓，點知曼城翼鋒史達寧仲為周日輸波耿耿於懷，同效力利物浦嘅祖高美斯發生衝突，最終史達寧被罰冇得喺周四對黑山嘅歐國外上陣。

不過，呢位曼城翼鋒隨後都喺ig認錯平息事件，領隊修夫基就叫球員要專心備戰。

周日嘅利城戰中，史達寧同祖高美斯一次爭波過後，前者好不滿於是上前理論，點知被祖高美斯推開。之後佢兩個返到國家隊訓練基地，史達寧條氣仲未順，見到對方就火都嚟埋。英媒話，史達寧率先去到訓練基地餐廳，祖高美斯嚟到後本來想同佢握手，估唔到史達寧居然出手叉對方頸部，搞到要隊友分開佢哋。英足總發聲明，指出手嘅史達寧會缺席對黑山嘅比賽。