陳智燊（Jason）去年離巢後，佢老婆宋熙年（Sarah）亦夫唱婦隨，今年7月約滿無綫走人。二人轉做YouTuber同司儀，據知佢哋兩夫婦平均每月各賺15至20萬，收入絕對比之前喺無綫嘅人工更加高。
自由更重要
Jason夫婦合辦嘅YouTuber頻道節目經常拍攝夫妻間生活樂趣，有時佢哋試過好嘅產品、食品或者旅遊資訊後，都會即時介紹畀網民，而佢哋嘅節目搞得有聲有色，𠵱家已經超過11萬名訂戶。
Jason噚日接受訪問，被問到做YouTuber係唔係每個月賺15萬至20萬時，佢即笑住話：「冇咁誇張，收入同以前差唔多啦！其實初時離開TVB係有啲擔心前路，因為有啲監製好意提醒我哋，話出面風大雨大，叫我哋諗清楚，我承認留低工作可能穩定啲，但自由更重要，冇諗過同老婆喺網上做節目有咁好反應，再做吓司儀、做吓舞台劇，工作量都唔錯，而且最緊要係𠵱家做嘢比較自由，可以做自己鍾意嘅嘢，我哋係做得開心嘅。」佢又透露與ViuTV正洽談合作，未來可能仲會喺公仔箱可以見到佢。
撰文：馮仁昭