「01112131」係咩？相信好多香港人都可以快速解讀到呢堆「警暴密碼」。6月反修例運動引爆多場警察之亂，無獨有偶全部同「1」有密切關係，呢隊自譽「亞洲第一」嘅香港警隊，究竟要為呢串數字再添幾多日子呢？
7.21、8.31、10.1、11.4，呢四日本來已經令香港人永誌不忘，但警察噚日又再刷出新下限，交通警居然向手無寸鐵嘅少年開槍。有網民將噚日「雙11」定為殺戮日，創作出「7.21唔見人、8.31打死人、10.1槍殺人、11.4阻救人、雙11狂殺人」呢句新口號。
譯埋日文「揚威海外」
開槍事件後，呢句口號迅速喺各區開花，八方見到無論係蒙面黑衣人、中環靚靚OL定係旺角阿叔，都好肉緊咁叫呢句口號，不過PoPo似乎好唔like，每次聽到都發狂，有粗口還擊。
網上仲有將呢五句口號譯成日文，畀更多日本人知道香港發生嘅事。八方就覺得，一隻手掌本來代表五大訴求，但𠵱家仲可以用嚟控訴警隊嘅五大警暴 ，但又咁講，如果再冇人制衡到PoPo，真係兩隻手都唔夠數。