西雅圖海灣者（圖）喺星期日嘅美職聯總決賽以3:1輕取FC多倫多，4年內第2度奪得美職聯總冠軍。今次係美職聯總決賽近4年第3度由海灣者同FC多倫多對壘，海灣者喺2016年互射12碼贏波奪冠，17年FC多倫多就成功復仇。星期日兩隊喺總決賽再遇，上半場踢成0:0，但海灣者喺下半場由奇雲尼艾丹喺57分鐘打破悶局後，後備上陣嘅域陀洛迪古斯喺76分鐘射成2:0，雷迪亞斯則喺90分鐘為球隊錦上添花。FC多倫多喺補時三分鐘由艾迪杜里破蛋，但為時已晚，海灣者結果以3:1取勝，贏得總冠軍，為海灣者射入第二球嘅域陀洛迪古斯則獲選為最有價值球員。