意甲啱啱喺周日就上演咗祖雲達斯對AC米蘭嘅傳統大戰，結果祖記最終以1:0贏咗今季勁頹嘅AC米蘭。「班馬兵團」嘅前鋒基斯坦奴朗拿度（C朗）今場又做主角，繼上周歐聯之後連續第二場中途被調離場，今次仲要喺下半場開始冇耐就被退下火線，一路走一路疑似爆粗，認真難服侍。
雖然話係傳統大戰，不過AC米蘭嘅實力同祖記都差咗一班，今季成績又差。原本都以為祖記可以大勝一場，但係班馬兵團今場就踢得仲差，上半場仲畀對手製造咗幾次入波機會，好彩祖記有施捷斯尼力保不失，半場雙方互無紀錄。
戴巴拿入替即入波
C朗今場嘅表現就認真一般，今場只係踢到55分鐘就俾教練沙利換出。今次係C朗自上季加盟祖雲達斯以嚟最早被換出嘅一次，而且仲係繼上周三對莫斯科火車頭嘅歐聯分組賽後，連續第二場喺賽事未分勝負之下被換走，嗰場波仲出現艾朗藍斯喺門前加多腳搶咗佢嘅入球，疑似黑面。到今次又要提早冇得踢，鏡頭就捕捉到C朗步離場走入球員通道嗰陣面都黑晒，仲口噏噏好似爆粗咁，有體育記者仲分析過C朗嘅唇語，話佢當時用葡萄牙語講咗句「Fxxk」，至於佢係對邊個講就不得而知喇。
意大利《米蘭體育報》就話C朗嬲到場波都仲未完場，佢就率先自己離開咗球場㖭。其實C朗上季喺意甲同歐聯全季加埋都只係被換出過兩次，而呢兩次都係當時大比數領先緊對手；今季未踢到一半都已經平咗上季嘅數字，佢咁嬲都唔係冇原因嘅。不過C朗嬲到爆炸都冇用啦，事實證明沙利今場換出佢係正確決定，入替佢嘅保羅戴巴拿就喺77分鐘接應希古恩嘅傳送，射入全場唯一入球奠勝，壓過國際米蘭重登榜首。
沙利幫C朗講好說話
沙利賽後就繼續幫C朗講好說話，仲解釋咗今次換出佢嘅原因：「我哋要感謝C朗，佢做足一切可行嘅事，並且作出好大嘅犧牲，只係我見佢今場未能夠踢出佢嘅水準，所以我決定換走佢。我理解佢被換出時嘅心情，呢啲係每個球員都有嘅自然反應，尤其是當佢哋盡咗力都被換走嗰陣。」沙利仲話C朗近一個月膝部韌帶都有輕傷，所以對佢表現有影響。