游飈1989年投考無綫第三期藝員訓練班入行，做了21年閒角，有「御用爛仔」之稱，2011年他離巢跳槽香港電視，可惜港視不獲續牌，最終他轉行經營環境工程公司。他早前接受《蘋果》專訪，談到在無綫的日子，直言每日要帶100個阿媽返工，他說︰「做得唔啱鬧你，做啱又鬧你，唔通鬧主角咩？」又因為經常被安排做惡人而捱出情緒病，令自己脾氣一觸即發。
游飈15歲的時候見到廣告，天真地以為做臨時演員可以月入過萬，怎料20多年過去，離開無綫時人工仍然只得10,500元。現年51歲的他說：「當年我過檔王維基，TVB都只係諗住加我300蚊。記得添哥（李添勝）退休晚宴，同枱有位高層問『你走咗咁多年，有冇興趣返吓嚟？』，我話『吓，唔好意思，我媽媽80歲，個女又細，仲有幾個人跟我搵食，我返去食乜？我好直，我唔可以再搵幾千蚊人工。」但他認為TVB不是全錯，因為這樣的條件仍有人爭住做，他笑說：「如果我間公司係咁就好，但呢個世界只有TVB可以咁。」
一劇演三角
自知臨記出身唔好，游飈開始時甚麼角色都接，有「御用爛仔」之稱，他坦言好厭惡：「人哋最唔鍾意做啲打家劫舍、姦淫擄掠，人哋唔做我就做，演員道德嘛，但原來建立嘅形象錯晒。」他自嘲只有「知樣度」，沒有知名度。參演經典劇《大時代》，他被網民發現一劇演三角，他笑說：「有人演9個、11個，我算最少。因為以前唔夠人用，冇話唔得㗎，只係剪埋剪埋原來同一場，播時先發現全部同一個人，有時睇返都唔知做過乜角色。」
游飈坦言做惡人心理影響大，捱出情緒病，現在做生意，待客要從頭學起：「你嘅性格會融入角色之中，演員情緒一到就爆，我向客人發脾氣都係非常之快，cut你線就cut你線，唔夠圓滑。49歲時，我先諗點做人，每日都提醒自己，要盡量用言語同人溝通，唔好鬧咁多，因為我哋係俾人鬧大，以前返電視台，我哋有句口頭禪，每日要帶100個阿媽返工㗎！因為你做得唔啱鬧你，做啱又鬧你，唔通鬧主角咩？梗係鬧我哋，因為我哋長期俾人鬧大，有時對人都會用呢個方法，叫潛移默化，我話想甩，就係甩呢啲。」
人不如電池
游飈想過改變戲路，但好角色難求：「我哋係等運到，電話響『喂，做乜呀，又打劫呀？』，你想做好人？可以，做村民啦，《包青天》背後嗰啲村民，咁你晚晚企喺度，痛苦㗎！由下午企到半夜再出外景。重要角色早已俾監製揀咗，或藝員調配組控制，揀完揀剩，其實冇乜好揀。」能在無綫工作長時間還可以成為男主角，游飈讚那些人不簡單，苦笑說：「攝影機嚿電池都要充電，但人唔使休息，人比電池仲不如。」
雖然開工辛苦，但游飈認為邵逸夫年代的TVB仍有人情味：「喺清水灣（TVB舊址），當時蝦叔（關海山）仲喺度，我哋攰到死都唔願走，一齊飲啤酒，聽前輩講嘢好享受。」但自從方逸華上場，公司為做靚盤數賣盤，事情變得不一樣。」
唔走回頭路
2011年王維基準備申請免費電視牌，游飈「投奔」港視，尋找希望：「見到啲器材好新穎，全部用嚟拍電影，有次遇到TVB隊拍處境劇，佢哋嗰啲機簡直係古董，老闆娘處心積慮慳錢，令員工士氣低落。」王維基最終未獲發牌，他有點可惜：「（TVB）任何一部劇都拍得好混亂、好悶，我做臨時演員時，有啲鏡頭係cut得，𠵱家竟然播出街，對比一間咁認真嘅公司冇得做，一定唔開心。」游飈仍然喜歡演戲，卻無意走回頭路，他用堅定的眼神說：「𠵱家生活得好開心！」
撰文：嵐山
攝影：沈健程
