【黑鏡線索】
一國兩制，政權當然想大家覺得，係一國大於兩制。不過係人都知，九七之前，本來就係兩國兩制咗一百五十年。呢兩制，牛頭唔搭馬嘴，大纜都扯唔埋，係現實。所謂嘅香港問題，就係當中英決定移交之後，點樣夾硬放兩制落一國嘅框架裏面。
兩制變形 防火牆失守
呢兩個制度撈埋一齊，隨時會爆炸。為安全計，一國兩制嘅思維，係盡量間開佢哋兩個，所以係港人治港，高度自治。當年大家諗住，一嚟應承有防火牆區間，二嚟中國可能越來越靠近自由世界文明，喺咁嘅前提底下，支持吓一國，奧運幫中國隊打吓氣，唱吓國歌，係接受範圍之內。
但近幾年，呢兩個前提越來越走樣。防火牆失效，港人治港越變西環治港，中港區隔變成大灣區融合，雙普選遙遙無期，而同時間中國同自由世界文明越行越遠。加上銅鑼灣書店事件，大家開始強烈感到，連香港隨時都會被中國引力，拉埋去極權世界軌迹裏面。
當兩制變形，一國就自然少咗支持，近幾年嘅民調，一直有呢個趨勢。777推送中法，直駁中國，連洗頭艇都慳埋，不單止令大家覺得防火牆進一步失守，最重要，逼香港人喺自由世界價值觀，同中國大灣區價值觀之間，作出一個清晰嘅選擇，再冇曖昧騎牆嘅餘地。
於是香港人就分成壁壘分明嘅兩個陣營。經過呢幾個月，到咗今日，兩個陣營人數大致穩定落嚟，經過7.21、8.31、10.1、11.3等等都繼續撐警暴撐極權嘅，大概核爆都唔會割，決定擁抱自由世界文明嘅，亦都係核爆都唔會割。
陣營對決 聚焦區議會
送中前，好多事件，例如DQ，例如高鐵，大家都傾向逐單逐單睇。反送中之後，由區議會選舉到年宵到食個飯，大家都戴上藍黃眼鏡去睇。有評論估計，777當初推送中，係懶聰明以為係平價版廿三條，如果係真，真係超巨型誤判。
社會有唔同聲音係好正常，問題係，要傾要討論，點都要有一啲common ground，如果唔係，連傾嘅基礎都冇，只會變成杜汶澤同阿叻嗰種咁，永遠唔會有結果。相信呢幾個月，類似嘅經驗，大家都經歷過。講極都好似踩空氣，惟有不斷下試到底個common ground喺邊到，直到發現連價值觀都南轅北轍，就知道好似美心「發言人」咁講，係時候要放棄。
月尾嘅區議會選舉，如果777政權唔取消嘅話，會因為777嘅送中，變相成為兩個陣營嘅冇約束力公投，到底係擁抱溫飽價值逆來順受，定係堅持抗爭做自由世界文明對抗極權嘅前線，到時兩個選擇嘅人數比例，就會揭盅。
撰文：宋漢生
fb : sunghsblog