自從反送中運動開始，由網民、示威人士發起嘅民間記者會，一直為呢班冇大台嘅抗爭者向市民發聲，但佢哋嘅代表除咗出席民間記者會，好似冇乜去主流媒體搞嘅活動，噚日《城巿論壇》竟然搵到民間記者會代表出席，連主持蘇敬恆都話今次安排好唔容易，而且仲吸引咗一班黑衣人到場打氣。
蘇B加位招待黑衫朋友
蘇敬恆（蘇B）噚日開始節目時，先感謝民間記者會派人出席《城巿論壇》，仲話佢知道唔容易，由於民間記者會呼籲巿民着黑衫同戴口罩到維園表達支持下，噚日參與城壇嘅巿民人數明顯增加，現場約三分一人士均戴上口罩或身穿黑衣，仲有數十名身穿黑衣和戴口罩嘅巿民在《城巿論壇》現場外圍觀看節目，蘇B話見到好多新朋友現身節目，但佢預先講明希望參與節目嘅人士，尊重其他同場人士着衫嘅自由。
雖然多咗黑衫朋友，但場內場外都互相尊重，冇事發生，好似場外睇節目嘅幾十名黑衣口罩巿民，佢哋都係民間記者會發言人、鄭松泰發言痛斥政府同警暴之後一齊拍手掌打氣，同埋係節目中段休息時叫「解散警隊，刻不容緩」口號，蘇B後來喺節目休息時段叫工作人員加開座位，畀場外市民可以入場睇。
講開噚日《城壇》，八方又不能不講其中一名嘉賓、香港教育工作者聯會黃楚標中學校監的黃均瑜，佢話晒做過三屆教聯會主席、退休前仲係校長，多少應該有啲墨水，但佢係節目入面竟連北大校長蔡元培的名字都講錯，講成為「周培元」，要鄭松泰出聲糾正：「蔡元培吓嘩！」先知講錯，你話點教學生！
李八方