建制派明知嚟緊區選勢必大敗，近期成日明示暗示想押後甚至取消選舉索性攬炒，但立法會前主席曾鈺成噚日就喺無綫節目《講清講楚》度懶有智慧咁分析，話建制派唔一定智商好高，但未至蠢到咁，因為唔搞選舉對建制派都冇好處喎。
對建制派冇好處，唔代表佢哋唔會做，例子可謂不勝枚舉，就好似支持送中惡法咪已經係最佳示範囉，更何況，建制派真係有咁建議㗎，仲要係嚟自曾鈺成個黨友、身兼行政會議成員嘅葉國謙，佢上星期先再建議，話如果投票日前一星期，即係17號前仲有示威衝突，政府就應該考慮押後或者取消區選，咁曾鈺成係覺得葉國謙智商唔高定蠢成咁先？
其實家陣建制派所謂嘅「暴力」，建制派受影響有限，反而民主派就真係被警察打壓選舉工程喇，因為連搞和平選舉活動都被指控係非法集結，然後再送上「催淚彈放題」，所以投票當日票站外如果排晒長龍，邊個敢保證警察唔會故技重施？