拿玻里上周六喺意甲鬥熱拿亞，前鋒恩斯治尼開賽兩分鐘食詐糊，最後同客軍悶和0:0，意甲四場冇贏過。拿玻里班主迪羅倫迪斯據報之前下令球隊今場前要加操，不過球員抗命「兵變」就引嚟球迷不滿，教練安察洛堤都話想走人，上周六比賽球場好多吉位，球員熱身嗰陣仲被侮辱，佢哋又點會有心機踢先？拿玻里班球員完場嗰陣仲俾球迷噓爆，睇嚟有排先反底。