平時寫稿，好怕聽到太大太多雜音噪音人聲，最好就係能夠獨自一人坐在寫字房寫呀、寫呀，好快就寫完！但太靜又似乎幾悶噃，於是開住收音機聽音樂，但香港冇咗數碼電台之後，FM台不時有雜聲，令人不快。卒之有老友教路，開住電腦收聽電台，配備一部微型Bose喇叭，用藍牙傳輸。老友意見又係幾正，益晒左丁山呢啲科技盲，後來又有朋友指點，上網下載一個網頁叫做Best Songs of All Time，有齊所有1950至1980嘅歐美大歌星名曲，開着電腦聽足兩小時都未聽得完，中間全無間斷，真係爽神。講到音響，當然唔算係一流，但左丁山並不是梁兆基咁對音響咁有苛求，已經好滿足。
本港銀行界有兩位著名經濟師叫做梁兆基，經常公開發言，夠晒權威嘅就係滙豐銀行亞太區顧問梁兆基（George），喬治梁與左丁山每年都會在論壇同台出現，可以見證，佢對美元利率及港元利率之走向，年年估中，去年年尾幾乎人人預測美國會加息，金管局猛咁呼籲市民注意美國會進入加息周期，喬治就斷言：「到咗2020年就會減息，即係話加息周期不會出現。」現在大家知道啦，何來加息周期？喬治梁說話幽默，似足冷面笑匠，觀眾聽完大笑，佢仍然板起塊面，滙豐搵佢出嚟講經濟形勢，事必要聽。
第二位梁兆基係星展銀行首席經濟師，哥倫比亞大學經濟系畢業，洋名叫Chris，佢話二十年前回港到滙豐見工，不被取錄，後來入咗星展，專注研究中國及香港經濟。左丁山搵佢講過人民幣，聽者無不嘆服，預言全部中晒，星展收埋佢作內部武器，向私人銀行部客戶演講，每有爆棚之盛，有人話：「Chris開騷收費都會滿瀉！」究其實，如果Chris開騷講高級音響，相信更多人要聽，佢之最大個人興趣並非中國經濟研究，而係音響，自己開咗一間音響專門店叫做「御品音響」。佢成日叫左丁山上去，聽吓畀吓意見。邊度有資格呀！唔敢去出洋相。英國專業雜誌HiFi Plus主編Alan Sircom今年8月來港，特別去「御品音響」參觀，之後寫咗一篇報導讚賞有加！尤其認為御品旗艦店──神曲音樂室（Divin Lab）搵到世界級音響調校專家Stirling Trayle（Audio Systems Optimised公司專家）親自來港調校，令店內音響達完美境地。Chris將篇報導傳畀左丁山呢位門外漢睇，自己當然未能完全掌握，後來同一位發燒友講起，佢唔係幾信，英國HiFi天書會推許香港一間音響店？但事實俱在，佢於是話：「可能係香港音響界第一次！」