美斯上周六連中三元，領巴塞隆拿喺西甲主場4:1大勝切爾達，職業生涯第52次演「帽子戲法」，單計西甲就第34次，追平宿敵基斯坦奴朗拿度（C朗）踢皇家馬德里時創下嘅西甲紀錄，不過C朗已經過檔祖雲達斯，再喺西甲踢波機會似乎唔大，睇嚟美斯好快就可以刷新紀錄，獨佔榜首（見附表）。
巴塞今場踢咗23分鐘就領先，切爾達嘅約瑟艾度喺禁區內手球，巴塞獲判12碼。美斯一射中鵠，巴塞領先1:0。42分鐘，切爾達由盧卡斯奧拿沙追平1:1，但美斯上半場補時階段直射罰球破網，巴塞半場領前2:1。48分鐘美斯又再入罰球，巴塞贏到3:1。完場前五分鐘，布斯基斯為巴塞埋齋贏4:1。
西甲34次 罰球勁到癲
美斯今仗憑1個12碼同2個自由球連中三元，據Opta統計，係佢歷來首次喺巴塞靠射入兩個罰球戴帽。呢位32歲球星喺職業生涯52次演出帽子戲法，當中包括西甲34次、歐聯8次、西盃3次、西超盃1次，幫阿根廷踢國際賽都有六次。「對住美斯，你真係點都唔會睇得住佢。」切爾達教練加西亞咁講。「佢射罰球真係勁到難以置信，但對住佢又好難唔喺危險位置輸罰球，佢玩晒啦！」美斯今季喺各項賽事夾埋入咗九球，當中有四球係罰球直射入網。自15/16年球季以嚟，佢合共射咗174個自由球，入咗22球，成功率高達12.6%，認真犀利。
賓施馬超越普斯卡斯
至於巴塞嘅宿敵皇馬，同日亦喺西甲靠賓施馬梅開二度，加埋沙治奧拉莫斯同費達歷高華維迪各建一功，作客大勝伊巴4:0。今場入兩球嘅賓施馬，個人累積為皇馬入咗157個聯賽球，超越普斯卡斯，升上隊史聯賽射手榜第六位。