獅子王係典型和理非，係自由市場擁護者，故此經濟見解經常與本地泛民不同，佢認為泛民經濟政策有將香港赤化染紅之嫌，過往不時同泛民支持者辯論。自林鄭推出送中條例，憑佢多年之商界觸覺，知道商人必定大力反對，因建制派商人對內地派幫忙費之陋習，認識尤甚，更有切膚之痛。今年五月，獅子王已同左丁山講：「乜林鄭咁心急？佢唔知送中條例會踩親佢啲支持者嘅咩？」哈！竟然就係詐唔知，透過西環強力鎮壓建制派之反對聲音，以為數夠票就可在立法會通過，現在當然搞出大頭佛啦！建制派商人其實要多謝示威者在612衝擊立法會，卒之令送終條例壽終正寢，不過佢哋多謝都冇句，聽慣話，收慣指示行止之人，係無法子有自由之精神獨立之思考嘅，現在咪又奉命撐警，砌黃絲囉！
獅子王反對一切暴力，點知在10月31日萬聖節，入夜後由砵典乍街行去半山行人電梯返屋企之時，畀警察截住，要佢行番去電車路，但電車路已催淚煙滿佈，點行呀？獅子王一於行上山，到擺花街已有人群聚集（從電車路避煙走上嚟），防暴隊趕至，放催淚彈，人群湧至荷李活道蘇豪區，獅子王被迫跟隨，走到蘭桂坊附近，催淚煙隨至，啲酒吧多得警察唔少，顧客四散，獅子王事後碰到一位洋人朋友，聽佢大罵警察粗暴：「本來好好哋，示威者唱歌嗌口號，冇動作，我哋在酒吧內飲酒當睇reality show，點知防暴隊殺上嚟放催淚彈，咁就亂晒大龍，警察點解要刻意破壞？」
獅子王唔識答，佢好辛苦行到返屋企之後，第一次覺得警察有種見人就噴胡椒水嘅心態，係復仇者心結，與正常執法者態度偏離得好嚴重。佢講完經歷，左丁山省起警察員佐級協會主席林志偉發信畀會員，呼籲「理智地執法」，真係有啲奇怪，執法唔使用理智，咁用乜？用個人情緒？想落牙煙，林志偉發信應不是無的放矢，而係經過理智思考而寫嘅，更加令人擔憂防暴隊已失去理智，或是總指揮失去理智。大編輯在11月2日星期六去尖沙嘴飲喜酒，佢話香港人似乎已見慣場面，當晚彌敦道催淚煙瀰漫，佢在加連威老道買皮帶，店舖冇關門，市民一樣行街食飯，站在街上「睇戲噓警察」，如此場面世界罕見，警察「執法」市民噓，林鄭肯唔肯用一分鐘諗吓箇中原因？大編輯又話，不少前線記者講及連日肚瀉，似與持續吸入催淚煙有關，既然肚瀉成為前線記者慣病，各位市民唔好在街上睇戲呀！