今季成日俾人笑火力唔夠嘅曼聯，近期有起色，喺周四歐霸盃分組賽L組賽事，領隊蘇斯克查排出三叉戟進攻組合，結果格連活特、安東尼馬迪爾同拉舒福特各入一球，喺主場大勝柏迪遜3:0，提前兩輪晉級32強之餘，亦係紅魔近4場比賽第3次入對手至少2球。
蘇B風騷讚入波高水準
兩星期前作客塞爾維亞，曼聯只係靠馬迪爾嘅12碼入波，小勝柏迪遜1:0，領隊蘇斯克查今場都唔敢輕敵，派出多名主力應戰，前鋒有安東尼馬迪爾同拉舒福特，拍住小將格連活特，中場有麥湯米尼同費特洛迪古斯，防線就有哈利馬古尼同艾舒利楊格壓場。
紅魔藉主場之利，一開始就撳住柏迪遜嚟打，踢到22分鐘，福仔喺中路突破，引嚟四個敵衞包抄後，再將個波傳格連活特，「綠木」喺禁區內控定之後再推大位，左腳一射入網，為曼聯打破缺口領先1:0。33分鐘，馬迪爾喺前場趁柏迪遜守將解圍失誤，搶到個波之後一路舞入禁區，再趁對方門將出迎前，快一步將個波送入網，協助曼聯贏到2:0。換邊後紅魔繼續搶攻，49分鐘，馬達轉邊傳畀左路嘅艾舒利楊格，後者再第一時間輕輕彈入禁區，福仔即時起左腳勁射掛網，為曼聯鎖定3:0勝局。
蘇B賽後大讚三位入球功臣：「三個入波都好高水準，格連活特入波之後，成隊波即刻定晒；馬迪爾嗰球就可以話係成晚技術含量最高嘅一球，至於拉舒福特用左腳都入到波，我就更加開心啦，佢本來就要用多啲左腳入波。」
美中不足嘅係麥湯米尼同哈利馬古尼，都喺賽事中受傷，前者踢到75分鐘就退下火線，傷勢睇嚟唔輕。蘇B話：「馬古尼踢得晒成場，冇乜大問題，但麥湯米尼麻煩啲，佢本身同我講話頂得住，但後尾都係唔掂。」
史高斯排紅魔最佳11人
曼聯今場有出色表現，喺電視台講波嘅紅魔名宿史高斯，揀選𠵱家曼聯最佳11人陣容時，就排咗個4-4-1-1陣式（見附表），將18歲嘅「綠木」擺喺前場右路。今場休息嘅丹尼爾占士踢左邊，福仔就移入中路，墮後支持踢箭頭嘅馬迪爾。史高斯仲話，馬高斯盧祖同域陀連迪路夫都信唔過，寧願用杜安薛比拍住馬古尼踢中堅。
總結形勢，曼聯喺歐霸盃L組，4戰後得10分排榜首，阿爾克馬爾以8分排第2，柏迪遜得4分排第3，艾斯坦拿就以0分包尾。由於曼聯喺兩循環「雙殺」柏迪遜，對賽成績佔優，所以可以提前兩輪鎖定出線席位。除咗紅魔之外，些路迪、西維爾、巴素利同埋武磊效力嘅愛斯賓奴，亦都喺今輪攞到出線資格。
