【驗樓直擊】「保齡球大王」楊氏家族旗下高譽投資發展的土瓜灣翰畋，有夫婦認為屬市區樓、校網佳，故買入一個高層單位；但樓盤是小型發展商首個單幢住宅項目，業主收樓前也抱未知「是驚還是喜」心態。最終在驗樓師詹濟南手上，15項工種有4項「捧蛋」，最令業主擔心是一塊比人還高的落地玻璃窗要更換，結果得51分。
大門旁放洗衣機
業主鍾氏夫婦是中產人士，丈夫是教師，太太從事金融業，數年前沽沙田中心一個單位賺百多萬元後，欲轉投市區樓。兩年前適逢高譽投資發展的土瓜灣單幢樓翰畋，鍾太說：「見近港鐵，又位處市區，睇完覺得幾好，亦睇好沙中綫同啟德發展，呢度屬九龍城校網，自己計劃生小朋友，可以自住或放租。」
鍾太說經紀有跟他們簡介發展商，「係保齡球大王，起啲咩飛鵝山別墅，我諗細發展商都有成長過程，就畀次機會佢」。2017年遂以逾800萬元買入翰畋高層一房單位，實用358方呎，呎價逾2.26萬元。
沒料同年底新地（016）同區推新盤Downtown 38，首批折實均價17,288元，比翰畋平逾兩成，鍾太呻笨。原預計6月收樓，但10月才到手，「沙中綫都話6月通車，但已冇人預計到」，收樓後，「經紀同我講單位向東南，點知原來向東北」。
詹sir則指大門旁組合櫃放置洗衣機古靈精怪，「香港地盡其用，有窿罅，塞得就塞」。轉入廁所，詹sir指廁所窗，「掃口粗糙，遠距離勉強可接受，近距離真係唔好睇喇。唔會滲水，係唔好睇」；轉身擰開企缸花灑，發現水龍頭「T」字位漏水，「應該漏咗塊膠皮」。
隔籬是睡房，詹sir在牆身不斷貼memo紙，「牆身污糟咗、黑咗、花咗」；敲近腳線牆身，「手都敲得響，面積都幾大，3呎長乘4吋闊。有時批盪前索咗啲水上牆，抹唔清就會『撲』；但呢啲位唔使擔心，起碼10年先剝落」。
行出露台，俯瞰啟德望維港，詹sir望向露台趟門路軌，「我估條軌藏水，丁屎咁大個窿，疏導唔到，通常去水窿會大啲」；如日後下大雨未至於入屋，但有機會藏水，但不建議鑿大去水窿，以免越弄越差。
詹sir驗樓工種15項，4項零分包括鋪磚、油漆、地板及窗，他總結：「呢個盤好過同區津匯，分數差廿零分。作為小型發展商，比成熟發展商有一段距離；小型發展商好蝕底，因為好多判頭做完呢個項目，再冇生意往來。唔同大型發展商不停有生意，判頭要顧住。」他說此樓盤交樓質素「不過不失」。
聽完詹sir評論，鍾太回應：「不過不失囉，好過對面津匯。始終發展商唔係大品牌，執漏係預計之內。叫發展商整返，問題迎刃而解，呢51分好值得。」她續稱：「聽到詹sir話客廳落地玻璃窗出現崩花要整塊換，個心都離一離，擔心換唔換到，因為要用吊船，塊玻璃仲高過個人。」
記者：陳家雄
