【銅鑼灣】楊愛瑾（Miki）2016年和永安集團太子爺郭永淳結婚，之後三年抱兩，生了一對子女Luken和Emma。Miki婚後做全職媽咪，不時被影到帶住傭人接大仔放學，親力親為照顧孩子。不過，女人幾忙都要shopping。日前《蘋果》在銅鑼灣時代廣場附近，發現身穿白tee襯牛仔褲的Miki掃完貨，她腳踏Chanel尖頭鞋、拎Hermès手袋，更有一袋二袋戰利品，熱到要邊行邊除外套，又忙着講電話，原來她正急call「救星」老公郭永淳。
坐低慢慢等
未幾，郭永淳一身西裝現身，相信是剛剛放工，Miki一見老公就將手上的環保袋、紙袋交到老公手上。兩公婆之後在希慎廣場護膚品店繼續買，店員見到Miki即熱情招呼，郭永淳熟路地走到VIP區梳化坐下耐心等候，並做頸部運動舒展筋骨。
Miki在店內慢慢揀，其間她都有去VIP區和老公傾偈，吃茶點醫肚。之後，Miki碌卡付款買了大批護膚品，戰利品就繼續由老公負責拎，她兩手揈揈輕鬆行，任勞任怨的郭永淳拿着東西跟在後面。二人之後並肩行往利園，到停車場取車離開。
讚老公好好
《蘋果》之後聯絡Miki，她表示當日湊了囝囝放學回家，才偷閒出來買東西，她說：「冇大掃貨，都係買返啲屋企冇嘅嘢。平時同小朋友一齊，冇時間買。」老公郭永淳出手拿東西，Miki冧爆：「哈哈，佢一向都好好㗎！」
採訪、攝影：朱志聰、楊定